Gripin með kíló af kókaíni

Hollenskt par var gripið glóðvolgt með rúmlega kíló af meintu kókaíni á Keflavíkurflugvelli á föstudaginn var. Fólkið var að koma með flugi frá Amsterdam. Efnin földu þau bæði innan klæða og innvortis. Talið er að götuvirði efnisins myndi vera á bilinu 10 til 15 milljónir króna. 

Samkvæmt upplýsingum Vísis er um frekar stóran feng að ræða og ekki algengt að fólk reyni að smygla svo miklu magni á þennan hátt.

Parið hefur verið úrskurðað í gæsluvarðhald til 27. apríl næstkomandi. Málið er eitt af stærstu fíkniefnamálum það sem af er árinu hjá lögreglu og tollgæslu á Suðurnesjum.