Runólfur sjaldan upplifað verri daga en eftir að sonur hans varð fyrir alvarlegri líkamsárás

„Ég hef sjaldan upplifað verri daga og óska engu foreldri þess hlutskiptis að vera í þeim sporum að bíða eftir því að barnið manns komist aftur til lífs eftir áfall sem þetta,“ skrifar Runólfur Ágústsson, fyrrverandi rektor Háskólans við Bifröst, þar sem hann skrifar um hvað þurfi að gera til þess að bæta öryggi gesta í miðborg Reykjavíkur.

Tilefnið er fólskuleg og að því er virðist tilefnislaus líkamsárás sem sonur hans, Eyvindur Ágúst, kærasta Eyvindar og vinur þeirra urðu fyrir aðfaranótt sunnudags í Hafnarstræti í Reykjavík.

Þremenningarnir voru á heimleið af skemmtistað um klukkan fjögur að nóttu þegar hópur fólks réðst á þau. Kærasta sonar Runólfs og vinur þeirra sluppu með mar og skrámur að sögn Runólfs en sonur hans var ekki svo heppinn. Hann fékk heilabæðingu.

„Ég ætla ekki að lýsa þeirri angist, þeim ótta og því varnarleysi sem við fjölskyldan upplifðum við sjúkrabeð sonar okkar næstu daga meðan við biðum milli vonar og ótta um hverjar afleiðingar þessa hroðalega verknaðar yrðu,“ skrifar Runólfur.

Segir þrjá ráðamenn hafa völdin til þess að efla öryggi

Svo virðist sem sonur Runólfs hafi ekki orðið fyrir varanlegu tjóni eftir árásina og er hann allur að koma til. Telur Runólfur að stórbæta þurfi öryggi í miðborg Reykjavíkur og leggur til þrjár leiðir til þess, ekki sé nóg að benda á tölfræði um að glæpatíðni hafi lækkað.

Bendir hann á að lögregla þurfi að stórauka viðvera sína í miðborginni um helgar. Viðveran skapi öryggi.

„Nú eru þúsundir drukkinna einstaklinga á ferli um miðborgina um helgar þegar skemmtistaðir loka og lögreglumenn í því mannhafi álíka fágætir og hvítir hrafnar,“ skrifar Runólfur og bendir jafnframt á að bæta þurfi lýsingu í almannarýmum borgarinnar

„Reykjavík er rökkvuð borg og ákveðin svæði í miðborginni eru illa lýst. Það sama gildir um mörg önnur almannarými þar sem árásir hafa átt sér stað sem ekki hafa leitt til ákæru,“ skrifar Runólfur.

Þá segir hann að myndavélar í upplýstu almannarými séu góð förvörn gegn ofbeldi í miðborginni. Hvetur hann Dag B. Eggertsson borgarstjóra, Sigríði Andersen dómsmálaráðherra og Sigríði Björk Guðjónsdóttur til þess að stuðla að bættu öryggi í miðborg Reykjavíkur.

„Við ykkur þrjú vil ég bara segja þetta: Börnin okkar eiga rétt á því að fara um borgina okkar án tillits til þess hvort þau eru drukkin eða ekki, án tillits til þess hvernig þau eru klædd og án tillits til þess hvenær þau eru á ferli.“