Frændurnir með tíu mörk og Rúnar fagnaði sigri

Aue vann sannfærandi sigur á Empor Rostock, 33-25, í þýsku B-deildinni í handbolta. Árni Þór Sigtryggsson fór mikinn í leiknum og skoraði níu mörk fyrir Aue en þjálfari liðsins er bróðir hans, Rúnar.

Sonur Rúnars, Sigtryggur Daði, skoraði eitt mark auk þess sem að Sveinbjörn Pétursson varði eitt skot eftir að hafa komið inn af bekknum.

Oddur Gretarsson, markahæsti leikmaður deildarinnar, hélt uppteknum hætti með liði sínu, Emsdetten, er hann skoraði átta mörk í naumum sigri á Bietigheim á útivelli, 34-33.

Aue er í fjórða sæti B-deildarinnar og er því í góðri stöðu til að blanda sér í baráttu um úrvalsdeildarsæti í vor. Emsdetten er í sjötta sætinu með 20 stig, tveimur á eftir Aue.