Brýnt að börn séu áhyggjulaus þrátt fyrir erfiðleika heima

Umboðsmaður barna telur líklegt að sömu reglur gildi um börn skuldugra foreldra í leikskólum og á frístundaheimilum. Hagsmunir barna af því að halda áfram leikskólagöngu sinni eða dvöl á frístundaheimili eiga því að ganga framar hagsmunum sveitarfélaga af því að innheimta gjöld fyrir vistun. Margrét María Sigurðardóttir, umboðsmaður barna, sendi bréf til sveitarfélaga landsins í október 2010 vegna málsins.

Í bréfinu kom fram að borist hefðu ábendingar um að börnum væri vísað úr leikskólum vegna skulda foreldra. Umboðsmaður barna hvatti sveitarfélög til að koma til móts við fjölskyldur í fjárhagsvanda og tryggja öllum börnum tækifæri til að ganga í leikskóla.

„Þegar börn upplifa erfiðleika á heimilum sínum er brýnt að þau geti leikið sér áhyggjulaus í leikskólanum þar sem þau finna fyrir stöðugleika og öryggi," segir í bréfinu, enda hafi leikskólar mikið menntunarhlutverk.

Margrét telur að ekki hafi verið brugðist fyllilega við bréfinu og börn skuldugra foreldra eigi enn á hættu að vera vikið úr leikskóla vegna þess.

Í fréttum Vísis fyrr í dag var fjallað um ótrygga stöðu barna efnalítilla foreldra á frístundaheimilum. Soffía Pálsdóttir, skrifstofustjóri frístundamála hjá skóla- og frístundasviði Reykjavíkurborgar, útskýrði að ýmislegt væri reynt áður en börnum sé vikið af frístundaheimili vegna skulda foreldra. „Þetta er viðkvæmur málaflokkur," segir hún en ekki sé hægt að halda börnum mánuðum saman á frístundaheimilum án þess að greitt sé fyrir þjónustuna.