Kæfði orðróma um neyslu með því að greina frá alvarlegum veikindum

Tónlistarmaðurinn Justin Bieber hefur undanfarið glímt við alvarleg veikindi, bæði lyme-sjúkdóm og einkirningasótt. Þessu greindi Bieber frá á Instagram-reikningi sínum í gærkvöldi og blés þar með á orðróma þess efnis að hann væri djúpt sokkinn í eiturlyfjaneyslu.

„Fullt af fólki hélt því fram að Justin Bieber liti hræðilega út, væri að taka inn metamfetamín o.s.frv. en það áttaði sig ekki á því að ég var nýlega greindur með lyme-sjúkdóminn, og ekki aðeins hann heldur glímdi einnig við alvarlegt tilfelli af krónískri einkirningasótt, sem hafði áhrif á húðina, heilastarfsemina og alhliða heilsu,“ segir Bieber í færslu sinni.

Þá segist hann munu greina frekar frá veikindum sínum, og baráttu við þunglyndi vegna þeirra, í væntanlegri heimildarmynd sem birt verði á YouTube í lok janúar.

„Þið getið kynnt ykkur allt sem ég hef verið að kljást við og YFIRSTÍGA!! Þetta hafa verið erfið tvö ár en ég hef fengið réttu meðferðina sem mun hjálpa mér að meðhöndla þennan sjúkdóm, sem hingað til hefur verið ólæknandi, og ég mun snúa aftur, betri sem aldrei fyrr.“

Myndir af veiklulegum Bieber höfðu verið birtar ítrekað í slúðurmiðlum og á samfélagsmiðlum undanfarin misseri. Í kjölfarið bar á vangaveltum um að söngvarinn væri djúpt sokkinn í neyslu og væri jafnvel að sprauta sig.

Lyme-sjúkdómurinn er smitsjúkdómur af völdum bakteríunnar borrelia burgdorferi. Hún berst í menn með biti skógarmítils. Einkenni útbreiddrar sýkingar geta verið viðvarandi liðbólgur, minnisleysi, síþreyta og hjartsláttartruflanir.