Verk­efnin of stór til að krefja ríkis­stjórnina um sam­ráð

„Það er verið að grípa til margra ágætra aðgerða en þetta er allt of fálmkennt og núna verið er að bjarga fyrirtækjum, jafnvel verið að aðstoða þau við að segja upp fólki þá þarf líka að verja það fólk og heimili þess fyrir tekjufalli. Þar fyrir utan skortir algjörlega aðgerðir til að verja sveitarfélögin sem eru að sinna okkar langdýrmætustu grunnþjónustu,“ sagði Logi Einarsson, formaður Samfylkingarinnar í kvöldfréttum Stöðvar 2.

Þorgerður Katrín Gunnarsdóttir, formaður Viðreisnar, segist sammála þessu. Hún fagni þó þeim skrefum sem tekin hafi verið, þau séu án efa mikilvæg en þau hefðu þó mátt koma fyrr. „Mér finnst gott að hrósa ríkisstjórninni fyrir það að gagnrýni skilaði sér og það sýnir mikilvægi gagnrýnar í þessu stóra máli. Útfærslan er enn eftir og það eykur óvissu. Við í Viðreisn munum leggja mikla áherslu á það að hafa leikreglurnar almennar, einfaldar og gegnsæjar þannig að allir viti í hvað að er stefnt.“

Þorgerður var einnig á línunni í Reykjavík síðdegis ásamt Sigmundi Davíð Gunnlaugssyni, formanni Miðflokksins. Þorgerður segir skrefin sem kynnt hafi verið í dag mikilvæg en þó þurfi að taka stærri og meira afgerandi skref.

„Nokkrir aðilar úti í atvinnulífinu, bæði í veitingahúsageiranum og í ferðaþjónustunni almennt, fólk var svolítið lamað, það var slegið eftir síðasta aðgerðapakka sem var í rauninni ekki neitt neitt þannig að þau hafa hlustað á þá réttmætu gagnrýni sem þau fengu í síðustu viku og komu þannig með þetta í dag og það mun skipta mjög miklu máli fyrir atvinnulífið, fyrir ferðaþjónustuna.“

Gott að gagnrýnisraddir skiluðu sér

Icelandair hefur ákveðið að grípa til fjöldauppsagna og var það kynnt í dag að rúmlega 2000 manns yrði sagt upp vinnunni fyrir mánaðamótin. Þetta er stærsta fjöldauppsögn í sögu Vinnumálastofnunar.

„Þetta er ákveðinn sorgardagur þegar svona stórum hópi fólks er sagt upp og ég hef miklar áhyggjur af þessu ástandi eins og það er í dag.“

Margir þingmenn minnihlutans hafa gagnrýnt ríkisstjórnina fyrir samráðsleysi en Þorgerður segist ekki vilja staldra við það. „Verkefnin eru miklu stærri en svo að við getum verið að krefjast þess að ríkisstjórnin verði í einhverju samráði. Þetta er leið ríkisstjórnarinnar og hún er búin að vinna svona allt kjörtímabilið og þá bara göngum við út frá því. Stóra málið er að það verði að taka hér nægilega stór skref þannig að þessi djúpa, mikla niðursveifla sem á sér enga líka verði ekki lengri en hún nauðsynlega þarf að vera.“

Hún segir að skrefin þurfi að vera stærri og afgerandi til þess að viðspyrnan og umfangið veðri í takt við það sem þessar aðstæður raunverulega kalla eftir. „Álagið á velferðarkerfið, álagið á ríkissjóð til lengri tíma, álagið núna er mjög mikið, en til lengri tíma þá verður álagið og þensla ríkissjóðs mun meiri ef að við gætum ekki að því að taka utan um þau fyrirtæki sem eru á Íslandi þannig að þau verði ekki klyfjuð hamfaraklyfjum til lengri tíma.“

Sigmundur Davíð segist sammála Þorgerði og pakkann sýna mikilvægi þess að gagnrýnar raddir geti heyrst í lýðræðissamfélagi. „Það sem gerðist í upphafi, til dæmis í tengslum við fyrsta aðgerðapakkann, var að það kunni einhvern vegin enginn við að gagnrýna en eftir annan pakkann fékk hann mjög mikla gagnrýni og eðlilega að mínu mati, að því marki að ríkisstjórnin taldi sig þurfa að bregðast við og gerir það núna.“

Hann segir svo virðast sem þessar breytingar hafi ekki átt sér langan aðdraganda en ríkisstjórnin hafi ekki einu sinni náð að kynna tillögurnar fyrir eigin þingflokkum. „Þó var alveg ljóst að það þurfti víðtækari aðgerðir fyrir mánaðamót og sú mikla gagnrýni sem kom fram hún hafði þessi áhrif á stjórnina.

Hann segir mjög gott að gagnrýnin hafi skilað sér og að ríkisstjórnin hafi brugðist við þeirri gagnrýni sem barst og gert breytingar.