Á bak við tjöldin hjá landsliðinu með Þorgrími Þráins

Þorgrímur Þráinsson, rithöfundur og fyrrverandi landsliðsmaður í knattspyrnu, er einn af mönnunum á bak við tjöldin hjá karlalandsliði Íslands. Hann hefur í mörg ár ferðast með landsliðinu hvert sem það fer og verið strákunum stoð og stytta.

Þorgrímur, sem spilaði lengi með Val og er Valsari í húð og hár, gaf á dögunum út bók þar sem hann leyfði lesendum að kíkja í heimsókn á bak við tjöldin. Vísir fjallaði um valda hluti úr bókinni, meðal annars setningu Lars Lagerbäck sem Kári Árnason segir mikilvægasta framlag til íslensks fótbolta og snýr að því að tapa ekki stöðunni einn gegn einum.

Landsliðið dvelur á fimm stjörnu hóteli hér í Kabardinka við Svartahaf. Þar eyða þeir löngum stundum saman á milli æfinga og er Þorgrímur stundum með símann á lofti og tekur myndir. Myndirnar veita innsýn í daglegt amstur strákanna en fjölmiðlum er bannaður aðgangur að hótelinu sem öryggisverðir með vélbyssur gæta.

Hér að neðan má sjá nokkrar myndir úr smiðju Þorgríms sem hafa vakið mikla athygli á Facebook.