Sýknaður þrátt fyrir samræði gegn hennar vilja

Ungur pólskur karlmaður hefur í Héraðsdómi Reykjavíkur verið sýknaður af ákæru um að hafa nauðgað stúlku í kjallara Hótels Sögu í mars síðastliðnum. Fjölskipaður héraðsdómur komst að þeirri niðurstöðu að athæfi mannsins gæti ekki talist ofbeldi í skilningi laga, og að manninum hafi ekki hlotið að vera það ljóst að samræðið við konuna væri gegn vilja hennar.

Maðurinn var ákærður fyrir að hafa þröngvað konunni til samræðis með ofbeldi með því að ýta henni inn á salernisbás og hafa þar munnmök við hana, sleikja kynfæri hennar, hafa við hana samræði og reyna að setja getnaðarlim sinn í endaþarm hennar.

Í dómnum segir að framburður stúlkunnar sé einkar trúverðugur og að ljóst sé að samræði hafi átt sér stað, gegn hennar vilja, og nokkurn vegin eins og lýst er í ákæru.

Hins vegar segir í dómnum að ekki verði séð að ákærði hafi haft ástæðu til að halda að „hún væri honum andhverf“ þar sem þau urðu samferða niður að snyrtingunni og frásögn mannsins um að vel hafi farið á með þeim sé ekki ótrúverðug. Hún hafi auk þess ekki streist á móti á meðan á samræðinu stóð, og ekki reynt að kalla á hjálp þegar einhver kom ínn á salernið. Sjálf segist hún hafa verið í of miklu áfalli til þess.

Þá segir að ef byggt sé á frásögn stúlkunnar af því sem gerðist líti dómurinn svo á „að það að ákærði ýtti [stúlkunni] inn í klefann, læsti klefanum innan frá, dró niður um hana, ýtti henni niður á salernið og síðan niður á gólf, geti, hlutrænt séð, ekki talist ofbeldi í skilningi [laga], eins og það hugtak hefur verið skýrt í refsirétti og langri dómaframkvæmd.“ Það eitt myndi nægja til að sýkna manninn, segir í dómnum.