Býst við fleiri uppsögnum um næstu mánaðamót

Laun hjúkrunarfræðinga hafa skerst það mikið á síðustu árum að þeir hafa í raun unnið launalaust í eitt af síðustu fimm árum. Þetta fullyrðir formaður Félags íslenskra hjúkrunarfræðinga og jafnframt að búast megi við fleiri uppsögnum um næstu mánaðarmót ef ekkert verði gert.

Um tvö hundruð og sextíu hjúkrunarfræðingar sögðu upp störfum á Landspítalanum fyrir síðustu mánaðarmót meðal annars vegna óánægju með laun. Það er um fimmtungur þeirra hjúkrunarfræðinga sem starfa á spítalanum. Elsa B. Friðfinnsdóttir formaður Félags íslenskra hjúkrunarfræðinga segir að hjúkrunarfræðingar hafi fundið mikið fyrir sparnaðinum á Landspítalanum og hann haft veruleg áhrif á laun þeirra.

„Það er alveg ljóst að eins og fram hefur komið hjá forstjóra þegar búið er að skera niður um 32 milljarða á fimm árum þá verður það ekki gert öðruvísi en að ganga inn í laun starfsmanna, því það er 70% af rekstarkostnaði, og hjúkrunarfræðingar eru um 30% af öllum mannaflanum þannig það er tiltölulega einfalt reikningsdæmi að sjá það og finna það út að til þess að ná þessum sparnaði á fimm árum þá þýðir það að hjúkrunarfræðingar, eða af launum hjúkrunarfræðingum hvers og eins, hefur sparast um milljón á ári. Sem þýðir bara það að á fimm árum má segja að hver hjúkrunarfræðingur hafi unnið eitt árið launalaust," segir hún.

Elsa segir fleiri en einn þátt hafa haft þau áhrif að laun hjúkrunarfræðinga hafi lækkað á þessum tíma.

„Annars vegar sem sagt hafa stofnanasamningar ekki skilað hækkunum á dagvinnulaunum og hinsvegar hefur breyting á skipulagi deilda minna vaktaálag og nánast engin yfirvinna leitt til lækkunar á heildarlaunum."

Þá telur hún að búast megi við fleiri uppsögnum frá hjúkrunarfræðingum um næsta mánaðarmót ef ekki verði brugðist við.

„Ég er hrædd um að ef að ekki verður komin lausn í málið, viðunandi lausn, þá muni fleiri segja upp um næstu mánaðarmót," sagði Elsa B. Friðfinnsdóttir.