Enginn Íslendingur á meðal 25 bestu handboltamanna heims að mati Nyegaards

Enginn Íslendingur er á lista danska handboltasérfræðingsins Bents Nyegaard yfir 25 bestu handboltamenn heims. Listinn birtist á heimasíðu TV2 í dag.

Nyegaard miðaði við frammistöðu leikmanna frá og með heimsmeistaramótinu 2019.

Þrír Danir eru á meðal fimm efstu manna á lista Nyegaards. Besti handboltamaður heims að hans mati er hins vegar Norðmaðurinn Sander Sagosen.

Mikkel Hansen er í 2. sæti, Niklas Landin í því þriðja og Rasmus Lauge í því fimmta. Spánverjinn Alex Dujshebaev er í 4. sætinu.

Ekkert pláss er fyrir Aron Pálmarsson eða aðra Íslendinga á lista Nyegaards. Hann horfði einnig framhjá öllum sænskum leikmönnum.

Lista Nyegaards má sjá með því að smella hér.