Hanar að gala eigandann út af lögbýlaskrá

„Þeir gala og gala og gala. Þeir gala alveg út í eitt,“ segir Vígmundur Pálmarsson í Mosfellsbæ sem óskar eftir því að bæjaryfirvöld beiti sér gegn tveimur landnámshönum sem nágranni hans heldur.

Vígmundur býr á Reykjahvoli við Varmá. Handan árinnar býr Kristján Ingi Jónsson á Suður-Reykjum. Kristján heldur flokk landnámshænsna. Þar á meðal eru tveir hanar.

Hendur bæjaryfirvalda bundnar

„Þar sem um lögbýli er að ræða höfum við engin tæki eða tól til að bregðast við. Þeim sem búa á lögbýlum er frjálst að hafa hana þótt nágrönnunum finnist það ekki öllum jafn spennandi,“ segir Bryndís Haraldsdóttir, formaður bæjarráðs, sem kveður málið þó ekki úr sögunni af hálfu bæjaryfirvalda.

„Við erum að skoða skrá yfir lögbýli í Mosfellsbæ og erum að láta kanna hvort eðlilegt sé að óska eftir því við innanríkisráðuneytið að lögbýli innan þéttbýlis verði felld niður.“

Kristján Ingi hyggst ekki gefa eftir lögbýlisrétt sinn. „Það þarf þá að fara fyrir Alþingi,“ segir hann.

Hænurnar höfuðlaus her án hana

Að sögn Kristjáns Inga hefur bæði heilbrigðiseftirliti og dýraeftirlitsmanni, auk lögreglu, verið stefnt að Suður-Reykjum.

„Það átti held ég að slátra þeim hérna í heimkeyrslunni en þeim varð ekki kápan úr því klæðinu,“ segir Kristján sem undirstrikar að hanarnir hafi mikilvægu hlutverki að gegna. „Þeir eru að passa upp á hænurnar mínar. Meðan hænur hafa hana þá stjórnar haninn en ef það eru eingöngu hænur þá er allt í vitleysu því þá er goggunarröðin öll í tómu tjóni.“

Í hljóðeinangruðum kofa fram á miðjan morgun

Fyrir nokkru var reistur hljóðeinangraður kofi yfir hænsnin á Suður-Reykjum. Kristján segir hönunum hleypt út klukkan tíu eða ellefu á morgnana. Þeir gali „nokkrum sinnum“ yfir daginn þar til þeir fari inn í kofann klukkan sjö á kvöldin.

Vígmundur viðurkennir að með kofanum hafi ástandið skánað frá því áður þegar hann var vakinn af hanagali klukkan hálf fimm á morgnana. „En það eru allir hérna megin við ána búnir að fá nóg. Þeir gala á tuttugu til þrjátíu sekúndna fresti yfir allan daginn. Það er alveg fáránlegt að leyfa sér þetta.“