Coutinho ekki með gegn Crystal Palace

Philippe Coutinho leikur ekki með Liverpool gegn Crystal Palace í 2. umferð ensku úrvalsdeildarinnar á laugardaginn kemur vegna bakmeiðsla. Jürgen Klopp, knattspyrnustjóri Liverpool, greindi frá þessu á blaðamannafundi í hádeginu.

Coutinho missti einnig af 3-3 jafntefli Liverpool og Watford í 1. umferð ensku úrvalsdeildarinnar um síðustu helgi sem og sigrinum á Hoffenheim, 1-2, í umspili um sæti í riðlakeppni Meistaradeildar Evrópu á þriðjudaginn.

Mikil óvissa ríkir um framtíð Coutinhos en Barcelona vill klófesta Brasilíumanninn snjalla. Coutinho óskaði eftir því að vera seldur frá Liverpool í síðustu viku eftir að félagið hafnaði tilboði Barcelona í hann.

Í gær sagði Jorge Segura, framkvæmdastjóri Barcelona, að Katalóníufélagið væri nálægt því að landa Coutinho og Ousmane Dembélé, leikmanni Borussia Dortmund.

„Ég veit ekki af hverju fólk segir það sem það er að segja. Ég þekki hann ekki einu sinni og hef aldrei hitt hann,“ sagði Klopp aðspurður um ummæli Seguras.

„Við erum engir kjánar, við vitum að þetta er erfið staða. En það eru engar nýjar fréttir. Það er ekki alltaf auðvelt fyrir mig að segja allan sannleikann þótt ég vilji ekki ljúga. En svona er staðan núna,“ bætti Klopp við.