Viðskipti erlent

Stærsti olíufundur ársins jólagjöfin til Norðmanna

Kristján Már Unnarsson skrifar
Áhöfn borpallsins Leifs Eiríkssonar fann olíuna skammt frá vinnslusvæðinu Heiðrúnu.
Áhöfn borpallsins Leifs Eiríkssonar fann olíuna skammt frá vinnslusvæðinu Heiðrúnu. Wikimedia/Ulrich Latzenhofer

Bandaríska olíufélagið ConocoPhillips tilkynnti í gær um „verulegan olíufund“ í Noregshafi. Olíulindin er áætluð á bilinu 75 til 200 milljónir olíutunna og telst vera stærsti olíufundur ársins á landgrunni Noregs.

Það var borpallurinn Leiv Eiriksson sem boraði holuna um 23 kílómetra norður af olíu- og gasvinnslusvæðinu Heiðrúnu og 220 kílómetra vestur af bænum Brønnøysund. Hafsbotninn þar er á 355 metra dýpi en borað var niður á 2.200 metra dýpi.

Heiðrúnarsvæðið er 175 kílómetra norður af Kristiansund. Olía fannst þar fyrst árið 1985 og hófst olíu- og gasvinnsla þar árið 1995.

Olíu- og gasvinnslupallurinn Heiðrún.HARALD PETTERSEN/EQUINOR

„Þessi uppgötvun gæti stuðlað að því að framhald verði á meira en hálfrar aldar sögu okkar í Noregi,“ segir talsmaður ConocoPhillips í yfirlýsingu og vísar til þess að það var einmitt sama olíufélag sem tilkynnti norskum stjórnvöldum um olíufund á Ekofisk-svæðinu á Þorláksmessu árið 1969. Það var jólagjöf Norðmanna það árið og markaði upphafið að norska olíuævintýrinu, sem enn sér ekki fyrir endann á.

ConocoPhillips telur að félagið geti náð að vinna nýju olíulindina með mjög arðbærum hætti. Lágt jafnvægisverð olíu þurfi svo vinnsla hennar borgi sig. Fram kemur í tilkynningunni að þetta sé fjórða velheppnaða leitarborun félagsins á norska landgrunninu á síðustu sextán mánuðum.

Hálfrar aldar saga olíuævintýris Norðmanna var rifjuð upp í þessari frétt í fyrra:


Tengdar fréttir

Olíu­borun Norð­manna stangast ekki á við stjórnar­skrá

Norska ríkið braut ekki gegn stjórnarskrá landsins þegar heimilað var að ráðast í olíuborun á norðurslóðum. Hæstiréttur Noregs kvað í morgun upp sinn dóm í málinu sem umhverfisverndarsinnar hafa kallað „dómsmál aldarinnar“.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×