Vonbrigði að heyra af fjölda samkvæma og varhugaverðri hópamyndun á Laugavegi

Í dagbók lögreglunnar á höfuðborgarsvæðinu kom fram að töluvert hafi verið um samkvæmi í heimahúsi í nótt og allur gangur á hvort fólk virti tíu manna samkomubann eða ekki.

„Eitthvað virðist fólk hafa slakað á varðandi Covid,“ var sagt í dagbók lögreglu.

Þá mátti sjá mikla hópamyndun á Laugaveginum síðdegis í gær þegar tónlistarmaðurinn Auður skemmti gangandi vegfarendum. Um er að ræða verkefnið Sköpum líf í lokun á vegum Priksins sem er styrkt af Reykjavíkurborg.

Hægt er að horfa á tónleikana hér. 

Þorsti í fólki

„Ég verð að viðurkenna að þetta eru svolítil vonbrigði að heyra þetta,“ segir Rögnvaldur í samtali við Vísi um öll samkvæmin í heimahúsi.

„Maður hafði á tilfinningunni að síðustu tvær helgar hefði fólk verið að taka tillit til þessara tilmæla og halda að sér að hittast og svoleiðis. En á sama tíma skilur maður þetta alveg, það er mikill þorsti hjá fólki að hittast og þetta er þessi árstími sem fólk tengir við svona og hefðirnar ganga út á þetta. En þetta eru töluverð vonbrigði verð ég að segja,“ segir Rögnvaldur.

Hann segir að slík hegðun geti leitt til þess að faraldurinn komist á skrið á ný.

„Við erum búin að tala um það frá því í nóvember að við höfum miklar áhyggjur af þessum árstíma. Þetta er þessi tími sem fólk er að hittast saman og það er kjör endur fyrir veiruna að komast áfram, þess vegna er verið að biðla til fólks að vera ekki að hittast. Ég tala ekki um núna ef þú ert óheppinn og færð veiruna ertu að veðja jólunum þínum, þá verðurðu líklega í einangrun á jólunum.“

Ekki endilega óhætt utandyra

Hann segir hópamyndunina við tónleika Auður á Laugaveginum ekki æskilega.

„Það er vissulega virðingarvert að það sé verið að bjóða upp á skemmtun og eitthvað fyrir fólk en á sama tíma verður fólk að átta sig á því og muna hvað við erum að gera. Það er hægt að njóta tónlistar án þess að safnast saman allir og ekki sitja alla tónleikana. Halda hreyfingu og hjálpa til, ef það er verið að gera eitthvað til dægrastyttingar að búa ekki til raðir eða hópa. Ef fólki líður ekki vel í aðstæðum og finnst það vera þröngt að fara þá í burtu. Þessar tíu manna samkomutakmarkanir sem eru í gangi núna eru líka hugsaðar úti. Við erum að biðja fólk að taka þátt í þessu og hjálpa okkur. Það vita allir hvað við erum að gera og stefna að.“

Hann segir svona hópamyndun geta verið varhugaverða með tilliti til útbreiðslu veirunnar, þó svo að hún eigi sér stað utandyra.

„Það geta verið hættulegar aðstæður ef fólk er mjög þétt ef allir eru ekki með grímur og þess háttar, við höfum tekið eftir að fólk slakar á ef það er úti hefur tilfinningu að veiran dreifist minna og öðruvísi úti við en það er ekkert sjálfgefið að það sé þannig. Ef það er stutt í næsta mann fer hún auðveldlega á milli, ef það er kyrrt í einhvern tíma.“