Grímulaus og til vandræða í matvöruverslun

Sunna Kristín Hilmarsdóttir skrifar 2. desember 2020 06:25

Starfsfólk verslunarinnar kallaði til lögreglu en maðurinn var farinn af vettvangi þegar lögregla kom. Vísir/Vilhelm

Laust eftir klukkan fimm síðdegis í gær barst lögreglunni á höfuðborgarsvæðinu tilkynning um mann sem var í annarlegu ástandi, grímulaus og almennt til vandræða í matvöruverslun.

Maðurinn neitaði að fylgja reglum sem starfsmenn báðu hann um að fylgja og var því kallað til lögreglu. Þegar lögregla kom á vettvang var maðurinn hins vegar farinn að því er segir í dagbók lögreglu.

Upp úr klukkan níu barst lögreglu tilkynning um líkamsárás þar sem tveir menn veittust að einum manni. Árásarmennirnir voru farnir af vettvangi þegar lögregla kom á staðinn en sá sem ráðist var á var fluttur á sjúkrahús. Lögregla rannsakar málið.

Svipað mál kom svo upp skömmu eftir klukkan eitt í nótt. Þá barst lögreglu tilkynning um átök milli tveggja manna.

Árásarmaður var farinn af vettvangi þegar lögreglu bar að garði og var sá sem fyrir árásinni varð fluttur með sjúkrabíl að því er fram kemur í dagbók lögreglu. Málið er í rannsókn.

Auk þessa voru nokkrir ökumenn stöðvaðir í gærkvöldi og nótt grunaðir um akstur undir áhrifum áfengis og/eða fíkniefna.

Lögreglumál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.