Nokkur lönd sem náðu svipuðum árangri og Ísland í fyrstu bylgju kórónuveirufaraldursins virðast hafa náð að halda honum í skefjum á meðan þriðja bylgjan virðist ætla að verða stærri en sú fyrsta hér á landi. Sóttvarnalæknir bendir á að á Íslandi hafi verið gripið til talsvert vægari aðgerða en annars staðar.

Vel þótti takast að kveða fyrstu bylgju faraldursins niður hér á landi, sem og í löndum á borð við Ástralíu, Suður-Kóreu, Nýja-Sjálandi og Japan. Á tímabili í vor var nýgengi smita í öllum löndum nálægt núlli, samkvæmt tölum frá Sóttvarnastofnun Evrópu.

Faraldurinn hefur hins vegar aftur sótt í sig veðrið hér á landi. Nýgengi kórónuveirusmita á Íslandi um þessar mundir er rétt tæplega 270. Aldrei hafa fleiri verið í einangrun með virkt kórónuveirusmit í landinu og nú, eða 1.132 samkvæmt upplýsingum á Covid.is. Þegar mest lét í fyrstu bylgju faraldursins voru 1.096 með virkt smit, þann 5. apríl.

Hinum löndunum sem áður voru nefnd virðist hins vegar hafa tekist að halda faraldrinum í skefjum nú á haustmánuðum, sem raunar teljast þó vormánuðir á suðurhveli jarðar. Bandaríski læknirinn og rithöfundurinn Eric Tolop vekur athygli á þessu á Twitter-reikningi sínum í gær og birtir þar graf sem fengið er með greiningartóli Financial Times.

Grafið sýnir nýgengi smita á hverja milljón íbúa í Ástralíu, Víetnam, Japan, Suður-Kóreu, á Íslandi og Nýja-Sjálandi. „Þessi lönd brutu Covid á bak aftur, hrukku aftur í sama farið en öll nema eitt sigruðust aftur á faraldrinum,“ skrifar Tolop á Twitter-reikningi sínum, og vísar síðasta setningin til Íslands.

Inntur eftir skýringum á því að Ísland sé nú í verri stöðu en lönd sem náðu svipuðum árangri og við í baráttunni við fyrstu bylgju faraldursins bendir Þórólfur Guðnason sóttvarnalæknir á að aðgerðir á Íslandi hafi verið vægari en í umræddum löndum.

„Þessi lönd, eins og til dæmis Nýja-Sjáland, hafa verið með miklu miklu harðari aðgerðir en við. Bæði á landamærunum, þar er gjörsamlega lokað, þannig að fólk hefur ekki komist inn nema að vera frá Nýja Sjálandi. Og þeir þurfa að fara í fjórtán daga sóttkví. Þeir hafa líka verið með miklu harðari aðgerðir innanlands, þeir hafa verið með „lockdown“ hreinlega, fólk hefur ekki fengið að fara út þegar nokkur tilfelli hafa greinst. Þetta hafa verið miklu, miklu harðari aðgerðir í þessum löndum. Það er jú hægt að gera það ef menn vilja fara í svoleiðis aðgerðir en ég er ekki viss um að það sé vilji fyrir því hér,“ segir Þórólfur.

25 greindust með kórónuveiruna í Ástralíu síðasta sólarhringinn og 271 er með virkt smit í landinu öllu, samkvæmt opinberum tölum frá heilbrigðisráðuneyti landsins.  40 eru með virkt smit á Nýja-Sjálandi en aðeins einn greindist með veiruna síðasta sólarhringinn þar í landi. Þá greindust 84 með veiruna í Suður-Kóreu í gær og 1.421 eru í einangrun í landinu.

Allir sem koma til landanna þriggja þurfa að sæta fjórtán daga sóttkví við komuna, með örfáum undantekningum.

Faraldur kórónuveiru virðist þó mjög víða sækja í sig veðrið, líkt og hann hefur gert á Íslandi undanfarnar vikur. Mörg Evrópuríki hafa gripið til harðari aðgerða vegna uppgangs veirunnar síðustu daga. Þannig verður stórum hluta samfélagsins lokað í Tékklandi næstu vikurnar en þar í landi er nýgengi smita hið mesta í heiminum.