Ört dýpkandi lægð nálgast Ísland úr suðvestri. Henni mun fylgja væta og hvassviðri og verður víða sunna gola eða kaldi og rigning. Í dag gengur í suðvesta og vestan 13-20 m/s og bætir í úrkomu. Í kvöld fer lægðin norðaustur yfir land í kvöld og dregur víða úr vindi og úrkomu. Þó mun hvessa austantil á landinu og fyrir norðan breytist úrkoman í snjókomu á fjallvegum.
Hiti verður 4 til 12 stig en kólna mun í kvöld.
Á morgun spáir Veðurstofa Íslands suðvestlægri eða breytilegri átt 5-13 m/s og skúrum. Sums staðar norðanlands verður þó él eða slydduél. Hiti verður 1 til 8 stig og hlýjast syðst á landinu.
#Veður: Seint í kvöld kólnar snögglega norðanlands. Snjóar þá á vegi s.s. á Þverárfjalli, Vatnsskarði, á Öxnadalsheiði og krapasnjór norður um á Siglufjörð og Ólafsfjörð. Áfram verða él á annesjum N-lands í fyrramálið. #færðin
— Vegagerðin | Iceland Roads (@Vegagerdin) September 20, 2020
Veðurhorfur á landinu næstu daga
Á þriðjudag (haustjafndægur):
Norðaustan 10-15 m/s norðvestantil, annars hægari breytileg átt. Víða él eða slydduél um landið norðanvert, en stöku skúrir syðra. Hiti 0 til 6 stig.
Á miðvikudag:
Norðanátt og él um landið norðanvert með hita kringum frostmark. Bjart með köflum sunnan heiða, en stöku skúr framan af degi og hiti að 6 stigum yfir daginn.
Á fimmtudag:
Norðlæg átt og él eða slydduél norðantil, en léttskýjað sunnanlands. Hiti 0 til 7 stig, en víða vægt frost inntil landsins norðantil.
Á föstudag:
Fremur hæg breytileg átt og bjartviðri, en vaxandi suðaustanátt og þykknar upp suðvestantil síðdegis. Hlýnandi veður.
Á laugardag:
Útlit fyrir stífa suðlæga átt, rigningu og milt veður.
