Anníe Mist sýndur mikil heiður með að vera í fyrsta íþróttamannráði CrossFit

Anníe Mist Þórisdóttir er goðsögn í CrossFit heiminum og það sannaðist enn á ný þegar hún var valin í fyrsta íþróttamannaráð CrossFit samtakanna.

Íþróttamannaráð CrossFit samtakanna heitir á ensku Athlete Advisory Council og var kynnt á fundi nýja framkvæmdastjórans Eric Roza á dögunum.

CrossFit samtökin gáfu það síðan út í gær hvaða fjórar aðilar fá þá mikla ábyrgðarhlutverk að leiða þessa vinnu inn í nýja framtíð CrossFit íþróttarinnar.

Ráðinu er ætlað að hjálpa til við ákvörðunartöku CrossFit samtakanna og þeirra hlutverk er að tala máli íþróttafólksins sjálfs og nýta sér sinn reynslubanka.

Anníe Mist Þórisdóttir er ein af fjórum stofnmeðlimunum ráðsins en hin þrjú eru Meredith Root, Neal Maddox og James O Hobart. Öll hafa þau gríðarlega reynslu af öllum hliðum CrossFit íþróttarinnar.

Anníe Mist Þórisdóttir er tvöfaldur heimsmeistari í CrossFit, hefur unnið sér þátttökurrétt á ellefu heimsleikum, komist fimm sinnum á verðlaunapall og er auk þess einn af eigendum CrossFit Reykjavík. Anníe Mist hefur allan tímann verið frábær fyrirmynd og heillað alla með keppnisgleði sinni og jákvæðu hugarfari.

Hin konan í nefndinni er Meredith Root sem varði 30. sæti á heimsleikunum 2018 en hún hefur starfað í fimm ár sem CrossFit þjálfari og er lærður lífefnaverkfræðingur.

Karlarnir tveir hafa einnig mjög mikla reynslu af því að keppa og þjálfa. Neal Maddox varð heimsmeistari í flokki 40 til 44 ára árið 2018 og James O Hobart hefur mikla reynslu af liðakeppninni auk þess að keppa líka í einstaklingflokki á heimsleikunum.

„Heimsleikarnir í CrossFit hafa vaxið og búið til sitt eigið vistkerfi þar sem koma að hundrað íþróttamenn, dómarar og félagar. Með því að vinna náið með þessum mismunandi hagsmunaaðilum þá er ætlunin að koma íþróttinni okkar upp í nýjar hæðir,“ sagði Justin Bergh, framkvæmdastjóri heimsleikanna í CrossFit.

„Auk þess að ræða við einstaka keppendur og hópa íþróttafólks þá höfum við sett á laggirnar sérstakt íþróttamannaráð (Athlete Advisory Council) til að sækja í þá miklu reynslu sem leynist meðal okkar virtasta íþróttafólks. Við höfum þegar byrjað að tala við þau um hvernig er best að útfæra fyrstu heimsleikana sem verða bæði á netinu sem og í eigin persónu,“ sagði Justin Bergh.