Íslenski boltinn

KR-ingar í sóttkví - Verður mögulega breytt í vinnusóttkví

Runólfur Trausti Þórhallsson skrifar
Óvíst er hvort Kennie Chopart og samherjar hans í KR fái að fara í svokallaða vinnusóttkví.
Óvíst er hvort Kennie Chopart og samherjar hans í KR fái að fara í svokallaða vinnusóttkví. mynd/celtic FC

Íslensk fótboltalið sem taka þátt í Evrópukeppnum, Meistaradeild Evrópu eða Evrópudeildinni, mega fara í vinnusóttkví eftir að þau koma heim til Íslands. Það þýðir að þau mega æfa á meðan sóttkvínni stendur en ekki keppa leiki.

Þetta staðfesti Víðir Reynisson hjá Almannavörnum í samtali við RÚV í dag.

Víðir Reynisson, yfirlögregluþjónn almannavarna.Vísir/Vilhelm

Karlalið KR er nú í sóttkví eftir að hafa spilað við skoska félagið Celtic í undankeppni Meistaradeildar Evrópu á þriðjudagskvöld en leikið var í Glasgow, Skotlandi. KR-ingar lentu heima á Íslandi rétt yfir miðnætti á aðfaranótt miðvikudags en þá voru nýjar reglur varðandi sóttkví eftir komu til landsins komnar í gildi.

Páll Kristjánsson, formaður knattspyrnudeildar KR, staðfesti í samtali við Vísi að KR-ingar væru ekki í svokallaðri vinnusóttkví heldur hefðbundinni sóttkví sem þýðir að þeir geti ekki æft né spilað.

Það er þó möguleiki á að KR-ingar fái einnig grænt ljós á að fara í vinnusóttkví.

KSÍ gaf það út í dag að leik Íslandsmeistaranna gegn Val á laugardaginn hafi verið frestað fram til miðvikudags. Degi eftir að KR-ingar klára sóttkví.

Þá veit Páll ekki hvort fleiri leikir frestast en tap KR gegn Celtic þýðir að félagið fer nú í Evrópudeildina og gæti því þurft að fara aftur erlendis. Ef það gerist gæti fleiri leikjum liðsins verið frestað en Páll reiknar með því að þeir leikir yrðu leiknir undir lok Íslandsmótsins.

Breiðablik hefur þegar lagt fram umsókn vegna ferðar sinnar til Noregs í næstu viku, og ætla má að Víkingur R. hafi eða muni gera það einnig vegna ferðar til Slóveníu. FH leikur á móti liði frá Slóvakíu, Dunajská Streda, í Hafnarfirði í næstu viku og miðað við orð Víðis getur liðið lent á Íslandi degi fyrir leikdag.

Þessi niðurstaða gæti sömuleiðis gert Valskonum kleyft að vera gestgjafar í undankeppni Meistaradeildar Evrópu sem áætlað er að verði í október, en Valur hefur sóst eftir því.

Aðrar reglur um lið sem koma hingað til lands

Víðir var spurður út í hvort sömu reglur væru um lið sem kæmu hingað til lands til að spila við íslensk félagslið eða þá íslenska landsliðið. Ísland mætir Englandi á Laugardalsvelli þann 5. september.

Raheem Sterling og Harry Kane koma væntanlega með enska landsliðinu til Íslands í byrjun september.VÍSIR/GETTY

„Það er annað fyrirkomulag á því. Þau eru að koma inn í þessa svokölluðu búbblu sem sett er upp í sambandi við þessa UEFA-leiki. Þannig að liðin byrja í henni erlendis, fara í sýnatöku erlendis áður en þeir koma hingað og eru í hálfgerðri sóttkví áður en þeir koma til landsins. Þá fara þeir í sýnatöku hjá okkur á landamærunum og mega æfa og spila leikinn innan þess fimm daga ramma ef að þörf krefur á.“

„Eins og í tilviki enska landsliðsins þá munu þeir kannski ekki koma nema degi fyrir leik, mesta lagi tveimur dögum fyrir leik, en vegna þessa kröfu UEFA og umhverfis sem er skapað þar þá samræmist það þeim kröfum sem hafa verið gerðar hér og þar af leiðandi geta þeir spilað leikinn,“ sagði Víðir Reynisson að lokum.

Jónas Kristinsson, framkvæmdastjóri KR, sagði í viðtali við Fótbolta.net að hann væri ósáttur við það að ekki sætu allir við sama borð. Vitnaði hann þar sérstaklega í að félög erlendis frá geta komið hingað til lands og spilað án þess að fara í sóttkví.


Tengdar fréttir

Vongóður um að fótboltalið fari í vinnusóttkví og geti spilað

Unnið er að því hörðum höndum að fá botn í það hvort að landsleikir og Evrópuleikir í fótbolta geti farið fram hér á landi þrátt fyrir reglur um sóttkví. Víðir Reynisson yfirlögregluþjónn er bjartsýnn á að það gangi upp og segir málið skýrast á næstu dögum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.