Innlent

Minnihlutinn mótfallinn 600 milljóna viðbótarlántöku Sorpu

Elín Margrét Böðvarsdóttir skrifar
Eyþór Arnalds, oddviti Sjálfstæðismanna í borginni.
Eyþór Arnalds, oddviti Sjálfstæðismanna í borginni. Vísir/Vilhelm

Borgarstjórn samþykkti í gær erindi Sorpu bs. um heimild til tímabundinnar viðbótarlántöku upp á 600 milljónir til að mæta rekstrarvanda byggðasamlagsins. Erindið sendi stjórn Sorpu bs. á borgar- og bæjarráð allra sveitarfélaganna á höfuðborgarsvæðinu þann 24. febrúar þar sem þess er farið á leit við sveitarstjórnir að þær samþykki tímabundna lántöku í formi yfirdráttarheimildar til loka þessa árs.

Málið var til umfjöllunar á fundi borgarráðs 27. febrúar en tólf borgarfulltrúar meirihlutans samþykktu þann lið fundargerðar borgarráðs er málið varðar. Tíu borgarfulltrúar minnihluta greiddu atkvæði á móti og einn greiddi ekki atkvæði.

Sjá einnig: Stjórn Sorpu samþykki 600 milljóna viðbótarlántöku

„Ég óttast að hún verði nú ekki tímabundin og ekki sú síðasta. Við erum að sjá þetta í annað sinn sveitarfélögin hafa þurft að hlaupa undir „sorp-bagga“ Sorpu,“ sagði Eyþór Arnalds, oddviti Sjálfstæðisflokksins í umræðu um málið á fundi borgarstjórnar í gær. „Hér er enn og aftur verið að farið fram á að veðsetja útsvarstekjur Reykjavíkurborgar svo Sorpa geti fengið lán vegna framúrkeyrslu upp á einn og hálfan milljarð króna. Borgarfulltrúar Sjálfstæðisflokksins leggjast alfarið gegn því að veita veð í útsvarstekjum skattgreiðenda í Reykjavík vegna lausataka í rekstri byggðasamlagsins og greiða atkvæði gegn því,“ segir í bókun Sjálfstæðisflokksins.

Kolbrún Baldursdóttir borgarfulltrúi Flokks fólksins.visir/vilhelm

Kolbrún Baldursdóttir, borgarfulltrúi Flokks fólksins, lýsti jafnframt efasemdum í sinni bókun. „Borgarbúar munu bera hitann og þungann af greiðslu lána. Nú er beðið um 600 milljóna skammtímalán til viðbótar við 500 milljónir sem þegar er heimild fyrir. Heildarskuld er 4,1 milljarður. Stjórn ætlar að sitja áfram þrátt fyrir áfellisdóm sem lesa má í skýrslu innri endurskoðunar. Framkvæmdastjórinn rekinn en sagt að hann hafi ekkert saknæmt gert. Meðal bjargvætta eru stjórnarformaður Félagsbústaða og fyrrverandi fjármálastjóri. Flokkur fólksins veltir fyrir sér hæfi þeirra í þessu máli,“ segir í bókun Flokks fólksins.

Þá sagði Sanna Magdalena Mörtudóttir, borgarfulltrúi Sósíalistaflokksins, að nauðsynlegt væri að endurskoða uppsetningu og skipulag Sorpu í heild sinni. „Fyrirkomulag byggðasamlaga gerir það af verkum að ákvarðanataka er færð frá hinum lýðræðislega vettvangi sem nýtur beins aðhalds frá almenningi yfir á vettvang sem lýtur svipuðum lögmálum og einkarekin fyrirtæki,“ segir í bókun Sósíalista.

Sanna Magdalena Mörtudóttir, borgarfulltrúi Sósíalistaflokksins.Vísir/Vilhelm

„Aðkoma sveitarfélaganna er þá líkari eigenda hlutafjár og skyldur stjórnarfólks líkari þeim sem stjórnir einkafyrirtækja hafa gagnvart eigendum sínum,“ segir ennfremur í bókuninni. Þetta hafi að mati sósíalista skaðað og grafið undan opinberri þjónustu. „Við eigum að vinda ofan af þessu og endurreisa mikilvægar stofnanir samfélagsins með því að fella þær aftur inn í verksvið hins lýðræðislega vettvangs. Við eigum að einblína á að setja þeim samfélagsleg markmið en ekki kröfur um hagræðingu sem eru líklegar til að bitna illa á þeim sem eiga í hlut.“ 


Tengdar fréttir

Björn rekinn frá Sorpu

Birni H. Halldórssyni var í dag sagt upp störfum sem framkvæmdastjóra Sorpu bs.

Borgin í minni­hluta innan SORPU með meiri­hluta á­byrgða

Tekist var á framúrkeyrslu byggðasamlags SORPU upp á einn og hálfan milljarð á borgarstjórnarfundi í dag. Reykjavíkurborg hefur ekki meirihlutavald innan samlagsins og þarf að reiða sig á fulltrúa annarra sveitarfélaga sem í lang flestum tilvikum eru á vegum Sjálfstæðisflokksins.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.