Son sendi Tottenham upp í 5. sæti í blálokin

Son Heung-min tryggði Tottenham þrjú dýrmæt stig í dag þegar liðið vann 3-2 sigur á Aston Villa í Birmingham í ensku úrvalsdeildinni í fótbolta.

Son skoraði sigurmarkið seint í uppbótartíma eftir skelfileg mistök Björn Engels sem missti boltann framhjá sér og hleypti Son einum í gegn. Son skoraði tvö mörk í leiknum og Toby Alderweireld eitt en hann kom Villa yfir í upphafi leiks með sjálfsmarki. Engels skoraði seinna mark Villa þegar hann jafnaði metin snemma í seinni hálfleik.

Tottenham komst með sigrinum upp í 5. sæti og er með 40 stig, stigi minna en Chelsea. Villa er stigi frá fallsæti.