Einn leikmaður Manchester City í dag gæti grætt á því ef City missir 2014 titilinn

Manchester City gæti mögulega misst einn af fjórum Englandsmeistaratitlum félagsins vegna brota sinna á reglum um rekstur félagsliða og það gætu vissulega verið góðar fréttir fyrir suma eins og þá Steven Gerrard og Raheem Sterling.

Eins og er hefur Knattspyrnusamband Evrópu dæmt Manchester City í tveggja ára bann frá Meistaradeildinni auk þess að sekta félagið um 25 milljónir punda. Samkvæmt öllu eðlilegu þá ætti enska úrvalsdeildin einnig að sekta Manchester City fyrir svona stórtæk brot standi dómur UEFA.

Manchester City vann Englandsmeistaratitilinn 2014 með því að fá tveimur fleiri stig en Liverpool eftir æsispennandi lokasprett þar sem Liverpool menn köstuðu frá sér titlinum. Nú gætu þessir sömu Liverpool menn verið að fá titilinn á silfurfati.

Það er fróðlegt að sjá hvaða leikmenn gætu fengið óvænt verðlaunapening sem Englandsmeistari.

Steven Gerrard kemur náttúrulega fyrstur upp í hugann enda lék hann í sautján ár með Liverpool án þess að vinna Englandsmeistaratitilinn en vann nánast allt annað með félaginu.

Annar leikmaður í athyglisverði stöðu er Manchester City leikmaðurinn Raheem Sterling sem á þessum tíma var leikmaður Liverpool.

Raheem Sterling er því eini leikmaður City sem gæti grætt á þessu því hann myndi bæta við Englandsmeistaratitli og ætti því þrjá. Hann fór einmitt frá Liverpool, að eigin sögn, til að vinna titla.

Luis Suarez gæti líka fengið Englandsmeistaratitil falli slíkur dómur en eini titill hans með Liverpool var þegar liðið vann enska deildabikarinn 2012.

Hér fyrir neðan má sjá leikmannahóp Liverpool tímabilið 2013-14.

Markvörður: Simon Mignolet

Varnarmenn: Martin Skrtel, Glen Johnson, Jon Flanagan, Daniel Agger, Mamadou Sakho, Kolo Toure, Aly Cissokho, Jose Enrique.

Miðjumennn: Jordan Henderson, Steven Gerrard, Philippe Coutinho, Raheem Sterling, Lucas, Joe Allen, Victor Moses.

Framherjar: Luis Suarez, Daniel Sturridge, Iago Aspas.