Viðskipti innlent

Uppsagnir hjá Eimskip og TVG-Zimsen

Kristín Ólafsdóttir skrifar
Skipulagsbreytingarnar hjá Eimskip taka gildi þegar í dag.
Skipulagsbreytingarnar hjá Eimskip taka gildi þegar í dag. Vísir/Rakel

Stöðugildum hjá Eimskip og dótturfélagi þess TVG-Zimsen fækkar um fjórtán í skipulagsbreytingum sem taka gildi í dag, að því er fram kemur í tilkynningu. Hluta fækkunarinnar er náð fram með uppsögnum en ekki fást upplýsingar um það hversu mörgum var sagt upp.

Í tilkynningu frá Eimskip segir að umræddar skipulagsbreytingar feli í sér nýtt og samþætt sölu- og viðskiptastýringasviði hjá fyrirtækinu. Sviðinu tilheyra viðskiptaeiningarnar innflutningur og útflutningur, sem áður voru hluti af sviði innan TVG-Zimsen.

Björn Einarsson hefur verið framkvæmdastjóri TVG-Zimsen undanfarin ár. TVG-Zimsen

Björn Einarsson verður framkvæmdastjóri hins nýja sviðs. Björn hefur starfað hjá Eimskip og dótturfélögum í 14 ár, m.a. sem framkvæmdastjóri Eimskips í Evrópu en síðustu ár hefur hann verið framkvæmdastjóri TVG-Zimsen.

Samhliða því hefur náðst samkomulag við Matthías Matthíasson, sem verið hefur framkvæmdastjóri sölusviðs, um að láta af störfum. Honum eru færðar þakkir fyrir framlag sitt til félagsins í tilkynningu.

Edda Rut Björnsdóttir segir fækkun stöðugilda dreifast nokkuð jafnt yfir svið. Eimskip

Edda Rut Björnsdóttir, markaðs- og samskiptastjóri Eimskips, segir í samtali við Vísi að fækkun stöðugildanna dreifist nokkuð jafnt á þau svið sem heyra undir skipulagsbreytingarnar. Hún segir að einhverjir sem sinnt hafa umræddum stöðugildum láti nú af störfum vegna aldurs og aðrir séu að klára samningstímabil.

Þó hafi einnig þurft að grípa til uppsagna. Edda vill aðspurð ekki gefa upp hversu mörgum var sagt upp í tengslum við umræddar skipulagsbreytingar.

Vilhelm Már Þorsteinsson, forstjóri Eimskips. Eimskip

Haft er eftir Vilhelm Má Þorsteinssyni forstjóra Eimskips að með breytingunum sé verið að einfalda skipulag og gera fyrirtækið betur í stakk búið til að þjónusta viðskiptavini sína.

„Við höldum áfram á vegferð hagræðingar og samþættingar á sama tíma og við eflum slagkraftinn í sókninni,“ segir Vilhelm.

Stjórnendur á nýja sviðinu eru auk Björns, Sara Pálsdóttir sem leiðir innflutning, Sigurður Orri Jónsson sem leiðir útflutning og Elísa D. Björnsdóttir sem tekur við af Birni sem framkvæmdastjóri TVG-Zimsen. Þá leiðir Arndís Aradóttir tollskýrslugerð og farmskrá og Andrés Björnsson mun leiða viðskiptaþróun og kostnaðareftirlit.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
KVIKA
3,54
10
39.490
EIM
2,13
2
415
ICEAIR
1,93
52
21.975
VIS
1,63
6
121.858
SJOVA
0,62
2
9.586

Mesta lækkun dagsins


Félag
Br.%
Fjöldi
Velta*
TM
-5
4
85.650
EIK
-2,99
2
1.954
ARION
-2,61
9
54.103
BRIM
-1,72
1
612
REGINN
-1,11
2
62.303
Velkomin á Vísi. Þessi vefur notar vafrakökur. Sjá nánar.