Sýn skilaði hagnaði á fjórða árs­fjórðungi

Heildartekjur fyrirtækisins á ársfjórðungnum voru rétt rúmir sex milljarðar og hækkuðu um sex prósent milli ára.

Hagnaður var 122 milljónir en á sama tímabili í fyrra var tapið tæplega 1,2 milljarðar króna en í uppgjöri félagsins segir að leiðrétt fyrir virðisrýrnun hafi tapið verið 33 milljónir í fyrra.

EBITDAaL var 1,3 milljarðar á fjórðungnum og jókst um 32,3 prósent frá sama tímabili í fyrra. Fjárfestingar námu rétt rúmum milljarði en EBITDAaL að frádregnum fjárfestingum var jákvætt um 291 milljón, samanborið við 194 milljónir á fjórða ársfjórðungi í fyrra.

Hrein fjármagnsgjöld voru 327 milljónir og hækkuðu um 6,1 prósent milli ára.

Áhugasamir geta fundið frekari upplýsingar um ársfjórðungsuppgjörið hér.

Ársreikningur Sýnar sýnir að félagið tapaði 634 milljónum króna.

Umbreytingarár

Herdís Dröfn Fjeldsted, forstjóri Sýnar, segir í yfirlýsingu að árið 2025 hafi verið umbreytingarár hjá Sýn og það hafi markað tímamót hjá félaginu. Stefnumótandi ákvarðanir sem renni styrkari stoðum undir reksturinn og muni móta fyrirtækið til lengri tíma hafi verið teknar.

„Ráðist var í umfangsmikla endurmörkun þar sem vörumerkin Stöð 2 og Vodafone sameinuðust undir merkjum Sýnar. Endurmörkunin vakti mikla athygli á markaði og jókst vörumerkjavitund almennings hratt ásamt því að Sýn var tilnefnt sem Besta íslenska vörumerkið. Nýtt og einfaldara vöruframboð, þar sem fjarskipti og sjónvarp eru vöndluð saman, fékk góðar viðtökur á markaði. Heimatengingum fjölgaði um 7 prósent á milli ára og hafa aldrei fleiri verið með farsímaáskrift hjá Sýn,“ segir Herdís.

Þá hafi verið kláruð sala fjarskiptainnviða til Sendafélagsins eftir mikla undirbúningsvinnu í samstarfi við Nova og að dótturfélögin Njála, Já og Endor hafi verið sameinuð inn í rekstur Sýnar.

„Mikilvægum áfanga var náð þegar við kláruðum innleiðingu á nýjum ferlum og fjárhagskerfi sem gerðu okkur kleift að ráðast í ítarlegri starfsþáttagreiningu. Það veitir okkur skýrari sýn á afkomu allra rekstrareininga félagsins og leggur grunn að markvissum aðgerðum í hagræðingu og endurskipulagningu.

Þrátt fyrir krefjandi aðstæður sýna niðurstöður fjórða ársfjórðungs að aðgerðir ársins eru að skila árangri. Við stöndum því á traustari grunni og förum inn í næsta tímabil með einfaldari rekstrargrunn, skýrari stefnu og aukna getu til að skapa sjálfbæran og arðbæran vöxt.“

Vísir er í eigu Sýnar.