Innlent

Aka börnunum 140 kílómetra til að þau komist á íþróttaæfingu

Kristján Már Unnarsson skrifar
Zlata Boiko Sergeisdóttir var á leið á fimleikaæfingu á Egilsstöðum.
Zlata Boiko Sergeisdóttir var á leið á fimleikaæfingu á Egilsstöðum. Stöð 2/Egill Aðalsteinsson.

Grunnskóli Borgarfjarðar eystri telst í dag vera fámennasti grunnskóli landsins. Nemendur í vetur eru aðeins fjórir talsins en auk þeirra er eitt barn í leikskóladeild skólans. Fjallað var um skólann í þættinum Um land allt.

Við lok skóladags var hin níu ára gamla Zlata Boiko Sergeisdóttir að bíða eftir pabba sínum. Hann var að fara að aka henni á fimleikaæfingu, sem hún sækir tvisvar í viku alla leið á Egilsstaði. Þangað eru 70 kílómetrar, - 140 kílómetrar fram og til baka, og auk þess yfir heiði að fara, Vatnsskarð eystra, sem nær upp í 430 metra hæð yfir sjávarmáli.

Borgfirðingar byggðu skemmu yfir gervigrasvöll og fengu þannig ágætis íþróttahús.Stöð 2/Egill Aðalsteinsson.

Skólinn á Borgarfirði býr við ágætis aðstöðu og athygli vakti fyrir áratug þegar Borgfirðingar þáðu stuðning KSÍ til að gera gervigrasvöll en tóku verkefnið skrefinu lengra; byggðu yfir hann og fengu þannig ágætis íþróttahús. Börnin eru bara of fá til að hægt sé að mynda lið í hópíþróttum.

Strákarnir sækja báðir íþróttaæfingar á Egilsstöðum. Páll æfir bogfimi og Júlíus Geir æfir fótbolta.Stöð 2/Egill Aðalsteinsson.

Strákarnir í skólanum, þeir Júlíus Geir Jónsson og Páll Jónsson, sækja einnig æfingar á Egilsstaði. Júlíus æfir þar fótbolta tvisvar í viku og Páll æfir bogfimi þrisvar í viku. Okkur er til efs að nokkur börn á Íslandi sæki æfingar jafn langa vegalengd og þau.

Sigþrúður Sigurðardóttir, skólastjóri Grunnskóla Borgarfjarðar eystri.Stöð 2/Egill Aðalsteinsson.

Rætt var við nemendurna og skólastjórann Sigþrúði Sigurðardóttur í þættinum Um land allt á Stöð 2, sem fjallaði um mannlíf á Borgarfirði eystri. Þátturinn verður endursýndur næstkomandi laugardag kl. 17.20. 



Brot úr þættinum má sjá hér en þar sögðu krakkarnir frá íþróttaæfingunum:

Tengd skjöl


Tengdar fréttir

Erfiður aðskilnaður móður og dóttur á Ströndum

Mæðgur úr Árneshreppi á Ströndum, þær Edda Hafsteinsdóttir, kaupfélagsstjóri í Norðurfirði, og fimmtán ára dóttir hennar, Júlíana Lind Guðlaugsdóttir, lýstu erfiðum aðskilnaði í þættinum "Um land allt" á Stöð 2 í kvöld, en dóttirin þurfti í haust að yfirgefa sveitina sína og flytja til frændfólks í Grafarvogshverfi í Reykjavík þar sem tíundi bekkur grunnskóla er ekki kenndur í Árneshreppi.

Amman ræktar epla- og appelsínutré við Drangajökul

Amman í Skjaldfannardal í Ísafjarðardjúpi, Ása Ketilsdóttir, vakti athygli í þættinum "Um land allt" á Stöð 2 í gærkvöldi þegar hún sýndi skrúðgarðinn sem hún er búinn að rækta upp á bæ sínum, Laugalandi, inn undir Drangajökli. Þar er hún með á þriðja hundrað tegunda, þeirra á meðal margar sem teljast suðrænar, eins og bóndarós, og það á svæði sem þekkt er fyrir kuldaleg örnefni; Kaldalón, Snæfjallaströnd og Skjaldfönn. "Það er líka til Unaðsdalur," bætti Ása við og minnti á nafn næsta dals norðan Kaldalóns.

Einu börnin í Álftaveri hafa einkabílstjóra

Tvær systur á bænum Þykkvabæjarklaustri eru einu börnin sem eftir eru í fornfrægri sveit. Næstu leikfélagar búa í fimmtíu kílómetra fjarlægð og skólabílstjórinn, sem er þeirra einkabílstjóri, ekur tvöhundruð kílómetra á dag til að koma þeim í og úr skóla.

Keyrð 30 kílómetra leið í skólann

Grunnskólakennslu hefur verið hætt á Kópaskeri og eru börnin nú keyrð 30 kílómetra leið í sveitaskóla. Bænaskjöl og kærumál heimamanna gegn þessari ráðstöfun hafa engu breytt.

Finnst dásamlegt að vera í Árneshreppi

Kynslóðaskipti á tveimur bæjum í Trékyllisvík og fjölgun barna í skólanum á Finnbogastöðum hafa kveikt vonarneista um framtíð byggðar í Árneshreppi á Ströndum. Þetta kom fram í þættinum "Um land allt" á Stöð 2 í kvöld.

Ekkert barn yngra en 6 ára í Öræfum

Það er ákveðin viðvörunarmerki fyrir Öræfasveit að þar skuli ekki vera neitt barn yngra en sex ára, segir skólastjóri grunnskóla sveitarinnar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.