Katrín Tanja Davíðsdóttir skrifaði í gær pistil á Instagram um sína reynslu af hugarfari keppnismanns og því að vera alltaf að bera sig saman við aðra í stað þess að einbeita sér að því að verða besta útgáfan af þér sjálfum.
Katrín Tanja Davíðsdóttir hefur verið að rifja upp gömul myndbönd að sjálfri sér á Instagram þar sem hún var að stíga sín fyrstu sport í íþróttaiðkun. Í dag stefnir þessi tvöfaldi heimsmeistari á það að sýna sig og sanna á enn einum heimsleikunum.
Katrín Tanja hefur lært mikið á sínum CrossFit ferli til þessa og síðan að hún keppti á sínum fyrstu heimsleikum sumarið 2012. Katrín Tanja varð þrítugasta á fyrstu heimsleikunum og svo í 24. sæti á heimsleikunum árið eftir. 2014 tókst henni aftur á móti ekki að vinna sér þátttökurétt á leikunum sem var mikið áfall. Fimm komust á leikana frá Evrópu og hún varð sjötta í undankeppninni.
Hér fyrir neðan má sjá Katrínu Tönju skrifa um þessa upplifun sína af líklega mestu vonbrigðum ferilsins.
„Ég fæddist keppniskona. Frá þeim degi sem ég man eftir mér þá vildi ég keppa við alla og í öllu. Ég elskaði spennuna við að keppa og elskaði tilfinninguna að vinna. Ég hafði engar áhyggjur af því að með því að keppa kæmi alltaf hættan á því að tapa. Ég vildi bara keppa og sjá hvar ég stæði,“ skrifaði Katrín Tanja Davíðsdóttir.
„Ég sá alltaf keppnirnar sem leið til að bera mig saman við þá sem ég var að keppa við. Það sá samanburður sem pressaði á mig stanslaust að verða betri og gera betur. Árið 2014 náði það hins vegar í skottið á mér. Hugarfarið mitt um að ég væri betri en þessi og þessi stelpa eða það að ég væri alltaf að bera mig saman við einhverja aðra hafði ekki gengið upp. Ég var skyndilega ekki á þeim stað sem ég vildi vera,“ skrifaði Katrín Tanja.
„Þetta var alvöru vendipunktur fyrir mig. Þessi hrikalegu vonbrigði áttu eftir að breytast í minn stökkpall. Það þvingaði mig til að kafa djúft og spyrja sjálfa mig hvað ég vildi gera og hvað ég væri tilbúin að leggja mikið á mig til þess að ná því. Ég var stanslaust að spyrja sjálfa mig hvort ég væri að gera mitt allra besta. Ég fór að vinna að því að verða besta útgáfan af sjálfri mér í stað þess að vera að keppa við aðra,“ skrifaði Katrín Tanja.
„Aðeins þú veist hvort þú hafir virkilega gert þitt besta. Passaðu því upp á það að gefa alltaf allt þitt. Það er þar sem töfrarnir byrja,“ skrifaði Katrín Tanja.
Katrín Tanja komst ekki bara á heimsleikana árið eftir heldur varð hún heimsmeistari í CrossFit bæði árin 2015 og 2016. Karín Tanja hefur síðan verið sannkallaður sendiherra íþróttarinnar sinna og hefur opnað margar dyr fyrir CrossFit á alþjóðlegum vettvangi.
Heimsleikarnir í næstu mánuði verða vonandi hennar áttundu á ferlinum en hún hefur endaði meðal fimm efstu á síðustu fimm leikum sínum þar af í fjórða sæti 2019 og á verðlaunapalli árið áður.
