Svarar ekki hvort flugfreyjum verði sagt upp aftur verði nýi samningurinn felldur

Forstjóri Icelandair svarar því ekki hvort til greina komi að flugfreyjum verði sagt upp aftur, samþykki þær ekki nýjan kjarasamning. Hann hafi ekki trú á öðru en að samningurinn verði samþykktur. Formaður Flugfreyjufélagsins mun mæla með samningnum við félagsmenn sína.

Flugfreyjufélagið átti frumkvæðið að fundi með Icelandair hjá ríkissáttasemjara í gær eftir að flugfélagið ákvað að slíta viðræðum og segja upp öllum flugfreyjum á föstudag. Sagðist fyrirtækið ætla að ganga til samninga við annan samningsaðila.

„Það er á ábyrgð samningsaðila að gera allt sitt til að ná samningi. Við sáum þarna að við þyrftum að gefa allt í þetta, sem við gerðum,“ segir Guðlaug Líney Jóhannsdóttir, formaður Flugfreyjufélags Íslands.

Samningurinn byggir á þeim samningi sem flugfreyjur felldu fyrr í mánuðinum. Nýi samningurinn felur hins vegar m.a. í sér breytingar á tveimur umdeildum ákvæðum.

Forstjóri Icelandair sagði að nýi samningurinn fæli í sér viðbótar hagræðingu fyrir félagið. Er þessi samningur þá verri fyrir ykkur en sá fyrri?

„Á morgun eru kynningarfundir fyrir okkar félagsmenn og þar sem við munum fara í efnisatriði. Ég tel það rétt að félagsmenn okkar fái að heyra það beint frá okkur,“ segir Guðlaug.

Þú getur þá ekki tjáð þig að svo stöddu hvort samningurinn sé betri eða verri fyrir ykkur en sá fyrri?

„Nei, ekki að svo stöddu.“

Óttast þú að þessi ákvörðun Icelandair að slíta viðræðum og segja öllum flugfreyjum upp muni hræða flugfreyjur þannig að þær þori ekki öðru en að samþykkja þennan samning?

„Þær uppsagnir sem tilkynntir voru á föstudag hafa verið dregnar til baka. Ég vona að við förum að sjá til sólar og getum farið að horfa fram á veginn eftir þetta,“ segir Guðlaug.

Munt þú hvetja flugfreyjur til að samþykkja þennan samning?

„Við skrifuðum undir þennan samning og að sjálfsögðu geri ég það.“

Spurð út í aukna vinnuskyldu flugfreyja segist Guðlaug ekki geta farið út í nákvæm efnisatriði samningsins.

„Það er verið að mæta hagræðingarkröfu Icelandair. Það er vert að hafa í huga að kröfur Flugfreyjufélags Íslands eru engar. Við erum að leggja okkar lóð á vogarskálarnar til að aðstoða félagið í gegnum þær hremmingar sem nú ganga.“

Forstjóri Icelandair segir samninginn fela í sér aukið vinnuframlag flugfreyja og hagræðingu fyrir félagið.

„Það er samið um aukið vinnuframlag og eitthvað hærri laun. Þannig að félagið er að ná fram ákveðinni hagræðingu með þessum samningi,“ segir Bogi Nils Bogason, forstjóri Icelandair, en vildi ekki fara út í nákvæm atriði samningsins fyrr en hann hefur verið kynntur félagsmönnum Flugfreyjufélags Íslands.

Fari svo að flugfreyjur felli samninginn, munu þið halda ykkar striki, segja öllum upp aftur og semja við annan aðila?

„Ég trúi því nú ekki að þessi samningur verði felldur. Því miður þurftum við að grípa til ákveðinna aðgerða á föstudaginn því útlitið var þá að við kæmumst ekki lengra í viðræðum við Flugfreyjufélag Íslands. Það hefur verið okkar markmið númer 1, 2 og 3 að semja við Flugfreyjufélag Íslands. Við vonumst til þess núna að samningurinn verði samþykktur og við höldum áfram að vinna saman,“ segir Bogi.

Ekki liggur fyrir hve margar flugfreyjur verða endurráðnar.

„Við erum að setjast yfir það næstu daga og mun komast á hreint í þessari viku.“

Bogi segir samninga við lánardrottna og bandaríska flugvélaframleiðandann Boeing þokast áfram.

„Markmiðið er að klára þetta fljótlega þannig að útboðið geti farið fram í ágúst mánuði. Við sjáum ekkert sem á að stöðva það. En þetta er flókið og viðamikið verkefni.“

Hann segir Icelandair þurfa að skýra stöðuna betur fyrir fjárfestum þegar kemur að Boeing. Icelandair hefur tekið við sex Max-flugvélum frá framleiðandanum og pantaði 10 til viðbótar.

„Og spurningin snýst um hvort við munum taka við þessum vélum öllum eða ekki. Við sömdum um bætur frá Boeing út af tjóni sem við höfum orðið fyrir. Hugsanlega verður samið við Boeing um frekari bætur. Viðræðurnar snúast um þetta.“

Hafa þessar bætur sett ykkur í spennitreyju þannig að þið getið ekki bakkað út úr samkomulaginu og skilað öllum vélunum?

„Nei, bæturnar sem samið var um í fyrra hafa engin slík áhrif.“