Erlent

Barr sagður hafa gefið óviðeigandi skipanir með Trump í huga

Samúel Karl Ólason skrifar
William Barr, dómsmálaráðherra Bandaríkjanna.
William Barr, dómsmálaráðherra Bandaríkjanna. AP/Yuri Gripas

Saksóknari og embættismaður úr dómsmálaráðuneyti Bandaríkjanna munu segja þingmönnum í dag að William Barr, dómsmálaráðherra, og æðstu aðstoðarmenn hans hafi gefið óviðeigandi skipanir varðandi rannsóknir og réttarhöld sem tengjast Donald Trump, forseta Bandaríkjanna. Þessar ákvarðanir hafi byggt á pólitík og vilja Barr og annarra til að hjálpa Trump og fylgja vilja hans.

Aaron Zelensky, saksóknari, mun mæta á fund dómsmálanefndar fulltrúadeildar Bandaríkjaþings í dag og meðal annars svara spurningum um málið Roger Stone, vinar Trump til langs tíma og ráðgjafa hans.

Samkvæmt frétt Washington Post, sem byggir á því sem Zelensky mun segja í upphafi fundarins, mun saksóknarinn segja að þeir sem komu að málinu gegn Stone hafi orðið fyrir gífurlegum þrýstingi frá hæstu stigum Dómsmálaráðuneytisins um að létta refsingu Stone og koma vel fram við hann vegna sambands hans og forsetans.

Allir saksóknararnir fjórir sem komu að málinu gegn Stone sögðu sig skyndilega frá því í febrúar, vegna inngrips ráðuneytisins. Stone var dæmdur fyrir að ljúga að bandaríska þinginu, ógna vitni og að hindra framgang réttvísinnar og kröfðust saksóknarar að hann yrði dæmdur til sjö til níu ára fangelsisvistar.

Í kjölfar þess tísti Trump um það hve „hræðilega“ og „ósanngjarna“ meðferð Stone fengi og skömmu eftir það tilkynnti ráðuneytið að milda ætti refsikröfuna á þann veg að Stone myndi sitja inn að hámarki í fjögur ár.

Hann var að endingu dæmdur til 40 mánaða fangelsisvistar en Trump hefur gefið í skyn að hann muni náða vin sinn.

Karri Kupec, talskona Dómsmálaráðuneytisins, tjáði sig um ræðu Zelensky, eftir að hún var birt fyrir fundinn í dag, og sagði að Barr hefði talið refsikröfuna gegn Stone allt of stranga og að hún hefði ekki verið í samræmi við önnur sambærileg mál. Hún sagði Barr ekki hafa rætt þá ákvörðun við Trump eða nokkurn mann í Hvíta húsinu.

Eins og áður segir hafði Trump þó tíst um málið og var vilji hans augljós.

Kupec sagði einnig að Barr hefði ávallt tryggt að störf sín tækju mið af lögum en ekki pólitík. Barr hefur þó margsinnis verið sakaður um að haga sér ekki eins og dómsmálaráðherra heldur einkalögmaður Trump og grafa undan sjálfstæði Dómsmálaráðuneytisins.

John Elias mun einnig mæta á fund dómsmálanefndarinnar í dag en hann hefur starfað í samkeppniseftirlit dómsmálaráðuneytisins. Hann mun segja að Barr hafi skipað starfsmönnum að rannsaka sameiningar maríjúanafyrirtækja og þá eingöngu vegna þess að honum var illa við greinina sjálfa.

Samkeppniseftirlitið var einnig látið rannsaka samninga á milli Kaliforníu og bílaframleiðenda í Bandaríkjunum en Trump hafði þá gagnrýnt þá samninga harðlega á Twitter. Löngu seinna, þegar því máli virtist lokið var deildinni skipað að rannsaka tilkynningu ráðamanna í Kaliforníu um að ríkið myndi ekki eiga í viðskiptum við bílaframleiðendur sem standist ekki umhverfiskröfur ríkisins.

Trump hefur lengi og ítrekað gagnrýnt Kaliforníu fyrir að vera með strangar reglur um eldsneytisnotkun og útblástur bíla. Þær reglur eru strangari en almennar reglur í Bandaríkjunum og hefur Trump reynt að þvinga Kaliforníu til að fella þær reglur niður.


Tengdar fréttir

Dómsmálaráðherrann talinn hafa veitt Flynn sérmeðferð

Fyrrverandi alríkisdómari sem var fenginn til þess að gefa álit á óvæntri ákvörðun bandaríska dómsmálaráðuneytisins að draga til baka ákærur á hendur Michael Flynn, fyrrverandi þjóðaröryggisráðgjafa Donalds Trump forseta, telur ráðuneytið sekt um stórfellda misbeitingu valds. Dómsmálaráðherrann hafi veitt bandamanni Trump sérmeðferð.

Endurskrifa söguna í máli Michael Flynn

Rúmum þremur árum eftir að Donald Trump, forseti Bandaríkjanna, rak Michael Flynn, þáverandi þjóðaröryggisráðgjafa sinn, fyrir að ljúga að Mike Pence, varaforseta, og starfsmönnum Alríkislögreglu Bandaríkjanna, sem er glæpur, eru Trump-liðar nú að reyna að endurskrifa söguna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.