Innlent

Borgin tilkynnir Flugfélaginu Erni að rífa eigi viðhaldsstöð félagsins

Kristján Már Unnarsson skrifar
Hörður Guðmundsson í viðtali við Stöð 2 í flugskýli Ernis í dag: „Þetta er bara hrein og bein árás á flugsamgöngur innanlands."
Hörður Guðmundsson í viðtali við Stöð 2 í flugskýli Ernis í dag: „Þetta er bara hrein og bein árás á flugsamgöngur innanlands." Stöð 2/Friðrik Þór Halldórsson.

Reykjavíkurborg hefur tilkynnt Flugfélaginu Erni að rífa eigi viðhaldsstöð félagsins á Reykjavíkurflugvelli bótalaust vegna nýs skipulags. Forstjórinn Hörður Guðmundsson kallar þetta árás á innanlandsflugið enda geti þetta leitt til þess að starfsemi félagsins leggist af. Þetta kom fram í fréttum Stöðvar 2.

Í umræðum um að taka sneið af flugvellinum undir nýtt íbúðahverfi í Skerjafirði hefur verið gefið til kynna að það myndi ekki raska starfsemi flugvallarins. Svo virðist sem það sé ekki alveg allskostar rétt.

Reykjavíkurborg tilkynnti Herði að búið væri að skipuleggja veg þar sem flugskýlið stendur.Stöð 2/Friðrik Þór Halldórsson.

Það kallast Skýli 6, er út við ströndina, þar sem áformað er að brú yfir Fossvog taki land. Forstjóri Ernis segir að þann 30. apríl hafi hann verið kvaddur á fund lögfræðings borgarinnar og tilkynnt að samkvæmt nýju skipulagi ætti skýlið að hverfa.

„Við vitum ekki hvort það verður á morgun, í næstu viku, eftir mánuð eða ár. En það er boðað að leggja veg í gegnum þetta skýli,“ segir Hörður og bætir við að áður hafi verið gert ráð fyrir að vegurinn kæmi neðan við skýlið.

Flugskýlið er vinnustaður tólf flugvirkja Flugfélagsins Ernis og hefur alþjóðlega vottun Flugöryggisstofnunar Evrópu.Friðrik Þór Halldórsson.

„Þetta er mikið áfall, ef af verður. Þetta er bara hrein og bein árás á samgöngur, flugsamgöngur innanlands. Það er bara ekkert minna heldur en það.“

Í húfi sé rekstur Ernis; áætlunarflug til fimm staða innanlands en einnig sjúkra- og leiguflug. Tilkynnt sé að skýlið hverfi bótalaust þar sem ekki hafi verið gerður lóðarleigusamningur.

„Það er algjörlega bara vísvitandi verið að eyðileggja þá aðstöðu sem félögin hérna á Reykjavíkurflugvelli búa við, sem er reyndar mjög þröngur kostur. En svona vinnur bara, því miður, - borgin er að vinna með þessum hætti.“

Skýlið er vinnustaður tólf flugvirkja Ernis, hefur alþjóðlega vottun Samgöngustofu og Flugöryggisstofnunar Evrópu sem viðhaldsstöð, og er ein helsta forsenda flugrekstrarins.

„Það skiptir bara höfuðmáli því þetta er eina skýlið sem er vottað sem svokallað „base maintenance“ flugskýli fyrir flugvélar af þessari gerð. Við gætum ekkert farið neitt annað. Það er ekki annað í boði, sem er bara kippt upp úr hattinum, sko. Þetta er bara ekkert svoleiðis,“ segir Hörður.

Ein af flugvélum Ernis er í stórskoðun í flugskýlinu þessa dagana, svokallaðri C-skoðun.Stöð 2/Friðrik Þór Halldórsson.

Lokun viðhaldsstöðvarinnar kippi fótunum undan rekstrinum.

„Við getum ekki viðhaldið flugvélunum okkar sem þýðir það að þá verða þær bara stopp. Það er bara ekkert öðruvísi. Og þá leggst starfsemin að sjálfsögðu niður.

Það má enginn við þessu núna á covid-tímum þegar má segja að allt er undir og allt er rekið á mörkum hins ítrasta mögulega,“ segir Hörður Guðmundsson, forstjóri Flugfélagsins Ernis.

Hér má sjá frétt Stöðvar 2:


Tengdar fréttir

Segir nýja byggð í Skerjafirði atlögu gagnvart flugvellinum

Áform borgarstjórnarmeirihlutans um nýja byggð í Skerjafirði, sem kynnt verða á morgun, eru atlaga að Reykjavíkurflugvelli og skemmdarverk af stærstu gráðu, að mati Vigdísar Hauksdóttur, borgarfulltrúa Miðflokksins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×