Innlent

Guðmundur Franklín sækir nánast allt sitt fylgi til Miðflokksins

Heimir Már Pétursson skrifar
Sex einstaklingar, fimm karlar og ein kona, hafa hingað til fundið leiðina til Bessastaða.
Sex einstaklingar, fimm karlar og ein kona, hafa hingað til fundið leiðina til Bessastaða. Vísir/Vilhelm

Guðmundur Franklín Jónsson forsetaframbjóðandi sækir bróðurpart fylgis síns til þeirra sem myndu kjósa Miðflokkin ef kosið yrði til Alþingis nú samkvæmt nýrri könnun Gallup. Hann hefur ekkert fylgi meðal kjósenda þriggja flokka og lítið meðal kvenna.

Guðni hefur afgerandi forskot á Guðmund Franklín Jónsson samkvæmt nýrri könnun Gallup.Grafík/HÞ

Könnunin var gerð dagana 29. maí til 3. júní og sögðust 90,4 prósent ætla að kjósa Guðna Th. Jóhannesson en 9,6 prósent Guðmund Franklín Jónsson fyrrverandi verðbréfasala og hótelstjóra.

Karlar eru mun líklegri en konur til að kjósa Guðmund Franklín.Grafík/HÞ

Töluverður munur er á afstöðu kynjanna því 14 prósent karla myndu kjósa Guðmund Franklín í dag en 86 prósent Guðna.

Mikill meirihluti kvenna styður Guðna Th. Jóhannesson til áframhaldandi setu á Bessastöðum.Grafík/HÞ

Hins vegar myndu 95 prósent kvenna kjósa Guðna og fimm prósent Guðmund Franklín.

Þá er áberandi að hann sækir bróðurpart fylgisins til þeirra sem segjast myndu kjósa Miðflokkinn ef kosið yrði til Alþingis nú, eða 55 prósent en fjöríu og fimm prósent þeirra myndu kjós Guðna. Þá myndu 24 prósent þeirra sem ætla að kjósa aðra flokka en nú eru á Alþingi kjósa Guðmund Franklín.

Enginn þeirra sem kjósa myndu Samfylkinguna, Pírata og Viðreisn myndi kjósa Guðmund Franklín í embætti forseta Íslands.Grafík/HÞ

Tíu prósent kjósenda Sjálfstæðisflokksins myndu kjósa hann eins og sjö prósent kjósenda Vinstri grænna og fimm prósent kjósenda Framsóknarflokksins. En allir þeir sem myndu kjósa Samfylkinguna, Pírata eða Viðreisn myndu kjósa Guðna forseta.

Strax að loknum kvöldfréttum sýnir stöð 2 þáttinn Leiðin til Bessastaða í umsjón Heimis Más Péturssonar fréttamanns. Þar minnir Ólafur Þ. Harðarson prófessor í stjórnmálafræði við Háskóla Íslands á að Guðni hafi notið mikilla vinsælda meðal þjóðarinnar allt kjörtímabilið. Hann hafi skorað mjög hátt í öllum könnunum þar sem spurt hafi verið út í hversu ánægt eða óánægt fólk væri með störf hans.

„Þannig að það að ætla að fara í framboð gegn Guðna í þeim tilgangi að vinna hann virkar kannski ekki mjög raunhæft,“ segir Ólafur.

Þannig að við eru kannski að fara að horfa upp á að kosningarnar sem fram fara 27. júní fari á svipaðan hátt og þegar Sigrún bauð sig fram gegn Vigdísi?

Ólafur Þ. Harðarson telur líklegt að úrslit forsetakosninganna 27. júní verði svipuð og þegar Sigrún Þorsteinsdóttir bauð sig fram gegn Vigdísi Finnbogadóttur árið 1988.Stöð 2/Arnar

„Það er ekkert ólíklegt og annað sem gæti gerst og gerðist reyndar 1988 að ef það eru tveir í kjöri, segjum vinsæll forseti og flestir telja að hann sé alveg öruggur um sigur; er líklegt að kjörsókn minnki. Hún fór niður um 10 til tuttugu prósent áttatíu og átta og það gæti gerst líka núna,“ segir Ólafur Þ. Harðarson.

Leiðin til Bessastaða er í opinni dagskrá á Stöð 2 klukkan 18:55.


Tengdar fréttir

Hundrað og einn búinn að kjósa í for­seta­kosningunum

Hundrað og einn einstaklingur hafði greitt atkvæði í forsetakosningunum utan kjörfundar þegar fréttastofa náði tali af Bergþóru Sigmundsdóttur hjá Sýslumanninum á höfuðborgarsvæðinu nú síðdegis.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.