Stöðugildum lögreglu verður bætt við á höfuðborgarsvæðinu í átaki gegn heimilisofbeldi

Þremur stöðugildum lögreglu verður bætt við á höfuðborgarsvæðinu í fjóra mánuði til að efla samstarf lögreglu, félagsþjónustu og barnaverndar í sumar. Er þetta hluti af átaki gegn heimilisofbeldi og ofbeldi gegn börnum í tengslum við afleiðingar kórónuveirunnar.

Samband íslenskra sveitarfélaga hefur birt á vef sínum yfirlit yfir þær aðgerðir stjórnvalda sem snúa beint eða óbeint að sveitarfélögum.

Þar kemur meðal annars fram að ráðist verði í átak gegn heimilisofbeldi og ofbeldi gegn börnum, en 215 milljónum króna verður varið í átakið. Meðal helstu aðgerða er aukinn stuðningur við þolendur og fjölskyldur þeirra auk viðbótarframlags til Barnahúss.

Þremur stöðugildum lögreglu verður bætt við í fjóra mánuði á höfuðborgarsvæðinu til að efla samstarf lögreglu, félagsþjónustu og barnaverndar í sumar til að auðvelda markvissari aðkomu að þjónustu við börn í viðkvæmri stöðu. Unnið er nú að nánari útfærslu átaksins og er aðgerðin í vinnslu.