Upp með mér að mála Vigdísi

Eins og myndirnar sýna fræddi Elín Reynisdóttir förðunarfræðingur fjölda kvenna í verslun Make up store í Smáralind um andlitsförðun.

Vísir hafði samband við Elínu og Margréti R. Jónasdóttur eiganda Make up store og spurði þær út í námskeiðin og hátíðarförðun.

„Það sem ég er að leggja áherslu á á hópnámskeiðunum er að kenna konum að mála sig. Námskeiðin eru svolítið persónuleg. Ég sýni þeim grunninn og hvað hentar hverjum og einum," segir Elín.

Elín hefur farðað fjölda þekktra kvenna eins og Yoko Ono, Dorrit og Vigdísi Finnbogadóttur.

Hvernig var að farða Vigdísi? „Þegar ég málaði hana í fyrsta skiptið, en ég hef málað hana tvisvar, þá var ég alveg upp með mér því mér finnst hún svo merkileg kona.

En í annað skiptið? „Mér þótti það alveg jafn merkilegt."

Áttu góð ráð fyrir hátíðarnar þegar kemur að andlitsförðun? „Já ég myndi segja að konur ættu að nota gerviaugnahár yfir hátíðarnar. Þær mættu þora aðeins meira að nota þau og að nota glimmer eyeliner," segir Elín.

„Það er skemmtileg tilbreyting að nota glimmer á jólunum og það er létt. Mjög auðvelt fyrir allar konur að nota glimmer því það hrynur ekki og það gerir rosalega mikið fyrir andlitið," segir Elín.

„Ég ráðlegg konum að nota venjulegan dökkan eyeliner og setja svo gull- eða silfur eyeliner alveg neðst við augnlínuna," útskýrir Elín.

Ekkert aldurstakmark

„Námskeiðið er fyrir alla. Við erum alltaf með í hverri viku hópnámskeið á kvöldin eftir lokun," segir Margrét eigandi Make up store aðspurð hverjir mega sækja slík námskeið.

„Við fáum öðru hvoru gestakennara. Í desember og janúar er Elín Reynisdóttir gestakennari."

„Fjöldi kvenna vill læra að mála sig. Sumar vilja læra dagförðun og aðrar kvöldförðun," segir Margrét.