Segir algjörlega blint á köflum á Reykjanesbraut

Lögreglan á Suðurnesjum biðlar til ökumanna að fara varlega og gera ráð fyrir slæmu veðri á Reykjanesbrautinni sem eigi að öllum líkindum eftir að versna á næstu klukkustundum.

Í færslu sem embættið birti á Facebook-síðu sinni nú klukkan átta í morgun er greint frá því að lögreglunni hafi borist ábending frá ökumanni sem sagði mjög vont veður vera á Reykjanesbrautinni og „algjörlega blint á köflum.“

Leigubílstjórinn sem var á leið frá Reykjavík til Keflavíkur tjáði lögreglu að hann væri búinn að vera í 90 mínútur að komast frá Kúagerði að Vogaafleggjara.