Ákall frá landsbyggðinni

Ár eftir ár er slegið met í skráningartölum nýnema við Háskólann á Akureyri. Þetta telst ekki fréttnæmt í dag. Metið sem nú verður slegið mætti sennilega kalla heimsmet. Tölurnar hafa þó ekki verið gerðar opinberar því skráningarfrestur er ekki liðinn. Þessar fregnir má kalla góðar en raunveruleikinn sem blasir við skólanum er það ekki. Háskólinn getur ekki starfað með þeim hætti sem hann gerir í dag ef aðsóknarmet verður slegið enn á ný.

Það er áríðandi að stjórnvöld grípi strax til aðgerða, svo ekki stefni í óefni.

Skertar fjárveitingar

Háskólinn á Akureyri hefur til margra ára skilað góðum ársreikningum, skólanum hefur verið stjórnað af mikilli ráðdeild og hafa starfsmenn skólans gjarnan tekið á sig mestan skellinn. Það gengur ekki lengur, starfsmenn skólans eiga ekki að þurfa að hlaupa stanslaust eftir bunkanum. Þeir sem sinna kennslu hafa einnig skyldu að gegna til rannsókna. Það er kominn tími til að slaka verulega á sultarólinni sem þrengt hefur að skólanum undanfarin ár.

Ráðamenn vita af stöðunni sem uppi er en engin eru úrræðin, enn sem komið er. Því stendur skólinn frammi fyrir því að þurfa að takmarka aðgengi að námi. Stúdentar hafa lengi talað fyrir auknu fjármagni til háskólanna en rektorar hafa ekki rekið „vælukór“ til að þreyta landann, líkt og aðrir forstöðumenn ríkisstofnana gera. Takmarkað aðgengi að námi við Háskólann á Akureyri er grafalvarlegt mál fyrir íbúa á landsbyggðinni. Skólinn hefur mikla sérstöðu þegar kemur að sveigjanlegu námi, og sífellt fleiri velja að hefja nám við HA. Verði raunin sú að Háskólinn þurfi að takmarka fjölda nýnema er vart hægt að tala um jafnrétti til náms.

Góð fyrirheit

Í núgildandi stjórnarsáttmála ríkisstjórnarinnar er fjallað um jafnt aðgengi landsmanna að þjónustu, atvinnutækifærum og lífskjörum um land allt. Þá er sérstaklega fjallað um sérstaka hvata til þess að fólk velji að setjast að í dreifðum byggðum, meðal annars í gegnum námslánakerfið. Það er ekki vafamál að Háskólinn á Akureyri hefur þekkingu, reynslu og breitt námsframboð í sveigjanlegu námi sem falla að þessum markmiðum. Það er mikilvægt að hækka menntunarstig íbúa á landsbyggðinni, svo samkeppnishæfi sveitarfélaga á landsvísu vaxi. Á sama tíma leitast Háskólinn á Akureyri við að auka námsframboð sem tekur mið af þörfum atvinnulífsins.

Mikilvægi Háskólans á Akureyri

Hlutverk Háskólans á Akureyri er að auka vísindalega þekkingu í nútímasamfélagi og leitast hann því við það að vera virkur þáttakandi í samfélagslegri umræðu hverju sinni. Háskólinn hefur samfélagslega ábyrgð, meðal annars hefur hann fjölgað hjúkrunarfræðinemum sem fara í gegnum samkeppnispróf því ljóst er að ekki er nægileg nýliðun í greininni. Þá ætlar háskólinn að styðja við Sjúkrahúsið á Akureyri sem setti sér það markmið að verða háskólasjúkrahús. Sóknarfærin eru mörg, en í stöðugum eltingarleik við ríkið um aukið fjármagn þá renna tækifærin út í sandinn.

Treystum landsbyggðarskólanum til þess að standa straum af aukinni aðsókn. Kæru fjárveitingarhafar, aukið fjárheimildir til skólans svo að hægt sé að fjölga í starfsliði hans til að sinna kennslu og rannsóknum. Hlustið á ákallið!



Höfundur hefur nýlega lokið fjögurra ára setu í háskólaráði fyrir hönd stúdenta og verður brautskráð frá háskólanum þann 8. júní.