Vörur sem standast kröfur okkar

„Þetta form á búð hér á landi hefur ekki verið til áður með Make Up For Ever förðunarvörum. þetta kallast ekki „pro boutique“, heldur „showroom“ sem er nákvæmlega eins og „pro búð“ nema að það eru ekki innréttingar frá þeim og við megum ekki merkja húsnæðið okkar með stórum og miklum stöfum, heldur þarf þetta að vera svolítið falið og ekki í allra augsýn,“ segir Ásgeir Hjartarson hárgreiðslumeistari, en hann ásamt eiginkonu sinni Bergþóru Þórsdóttir, hárgreiðslumeistara og listförðunarfræðingi, mun opna búð í dag innan Mask – Makeup & Airbrush Academy förðunarskólans sem þau reka saman ásamt hárgreiðslustofunni Hairbrush.

„Við ætlum að halda aðeins upp á þetta í dag. Dj Tommi White verður að spila, við verðum með barþjóna á staðnum og ætlum að gefa nokkrum heppnum förðunarvörur í beinni og vera með einhvern smá kynningarafslátt,“ segir Ásgeir.

Með þessu fyrirkomulagi fá þau að njóta þeirra forréttinda að fá nýjar vörur frá Make Up For Ever á undan stórum búðum erlendis.

„Við komum til með að njóta þess að fá vörur um það bil mánuði áður en þær koma í stóru búðirnar eins og til dæmis Sephora,“ segir Ásgeir.

En hvernig kom það til að þið vilduð taka inn þessar vörur?

„Begga lærði upp úr þessum vörum fyrir mörgum árum, eða um 1988, og hefur keypt og notað þessar vörur í gegnum tíðina. Við vorum hreinlega í vandræðum með að finna vörur í skólann þar sem merki í þessum gæðaflokki voru þá samningsbundin hér heima og við vildum ekki vera með einhvern samtíning heldur vörumerki sem er þekkt og stenst allar kröfur okkar,“ útskýrir Ásgeir.

„Make Up For Ever er mjög sterkt varðandi skóla og þjónar fagheiminum vel. Þeir eru nýtískulegir og gæðin eru á heimsmælikvarða,“ segir Ásgeir ánægður.

Vörurnar frá Make Up For Ever hafa verið gífurlega vinsælar og hafa förðunarfræðingar hér á landi lengi beðið eftir því að vörunar yrðu fáanlegar hér. Það sem gerir vörurnar vinsælar er meðal annars gæði og flott markaðssetning.

Hvað er það sem gerir þessar vörur vinsælar? „Þeir eru með örar breytingar, nýta sér nýjustu tækni í þróun og framleiðslu varanna, en fyrst og fremst gæði,“ segir hann.

Allir geta keypt vörurnar, en Ásgeir bendir þó á að þau séu fyrst og fremst að fókusera á fagið sjálft og fólk sem starfar innan förðunargeirans.

„Við erum að einblína meira á fólk sem er að vinna við fagið og fólk sem hefur brennandi áhuga á góðum vörum og kann að fara með þær. Við komum til með að geta boðið upp á svokölluð „pro kort“ sem gefur handhöfum 20 prósenta afslátt í búðinni en með skilyrðum og gegn vægri greiðslu,“ segir Ásgeir.

Spurður út í verðið segir Ásgeir vörurnar vera á svipuðu verði og önnur þekkt merki. „Sumt er dýrara og annað ódýrara. En við myndum segja að Make Up For Ever sé algjörlega í takt hvað varðar verð og gæði. Við höfum fengið aragrúa af skilaboðum þar sem línunni er fagnað loksins almennilega hér á landi,“ segir Ásgeir og bætir við að þau séu virkilega spennt.