Fjölskylda í Noregi fær ekki skuldaleiðréttingu þrátt fyrir að hafa tekið verðtryggt íbúðalán

„Það er enginn fjárhagslegur hvati til að koma til Íslands,“ segir Grétar Þór Ævarsson, sem búsettur er í Noregi.

Hann hefur búið í Noregi með fjölskyldu sinni í eitt ár og gera þau ráð fyrir að vera ytra í að minnsta kosti fjögur ár í viðbót. Þau voru með verðtryggt húsnæðislán árið 2008 og seldu húsnæði sitt árið 2012. Húsnæðislánið greiddu þau meðal annars upp með séreignarsparnaði sínum.

Í skýrslu forsætisráðuneytisins segir að verðtryggð húsnæðislán verði færð niður um fjárhæð sem samsvarar verðbótum umfram 4,8% sem féllu til á tímabilinu desember 2007 til ágúst 2010. Þrátt fyrir að þau tilheyri þessum hópi fólks sem var með verðtryggð lán á þessu tímabili þá nær skuldaleiðréttingin ekki til þeirra því þau eru búsett erlendis.

„Skuldaleiðréttingin nær einungis til þeirra sem eru á íslenskum atvinnumarkaði eða eiga húsnæði á Íslandi,“ segir Tryggvi Þór Herbertsson, verkefnisstjóri um framkvæmd höfuðstólslækkunar íbúðalána.

Eiginkona Grétars er í sérnámi í læknisfræði sem ekki er kennt hérlendis og er því möguleikinn á að koma til Íslands ekki í boði. Hann segir fjölmarga Íslendinga vera í sömu stöðu.

Heildarumfang skuldaleiðréttingarinnar er metið á um 150 milljarða króna sem dreifist yfir fjögurra ára tímabil.

„Möguleg lausn væri að bjóða upp á undanþágu á fjögurra ára reglunni, einmitt fyrir þennan hóp sem ætlar sér að flytja aftur heim. Bara ekki á næstu fjórum árum,“ segir Grétar.

Einnig kemur fram í skýrslu forsætisráðuneytisins að aðgerðirnar muni aflétta efnahagslegri óvissu er varða skuldamál heimilanna og að samhliða lækkun skulda muni aðgerðin auka ráðstöfunartekjur heimila og hvetja til sparnaðar með skattleysi séreignarlífeyrissparnaðir. Með því muni myndast aukinn hvati til fjárfestingar þegar heimilin hafi meira svigrúm til fjárfestinga.

„Þetta hefði getað verið útspil til að sporna við þessum ótta að fólk sé að fara frá landinu og á sama tíma tækifæri til þess að laða Íslendinga aftur til síns heima.“