Simpsons-auðjöfur gefur auðæfi sín til góðgerðarmála

Sam Simon, einn af upprunalegu höfundum teiknimyndaþáttanna um Simpson-fjölskylduna, ætlar að ánafna góðgerðarstofnunum auðæfum sínum, en hann greindist með ólæknanlegt krabbamein á dögunum.

Simon er þekktur fyrir rausnarleg framlög sín til góðgerðarmála og munu peningarnir renna til dýraverndunarsamtaka og í mataraðstoð fyrir fátæka og heimilislausa.

Simon segist í samtali við The Hollywood Reporter eiga „meiri peninga en hann hafi áhuga á að eyða“, en fyrir fimm mánuðum greindist hann með ristilkrabbamein og sögðu læknar hann eiga þrjá til sex mánuði eftir ólifaða.