Dagur um ferðakostnaðinn: Reykjavíkurborg til fyrirmyndar

Dagur B. Eggertsson segir það prýðilegt að upplýsingar um ferðakostnað borgarfulltrúa hafi verið teknar saman.

Upplýsingarnar voru lagðar fram á borgarráðsfundi í morgun en þær voru teknar saman að beiðni Ólafs F. Magnússonar borgarstjóra í kjölfar umræðu um launakjör Jakobs Frímanns Magnússonar.

Í tölunum kom fram að kostnaður við ferðalög Dags B. Eggertssonar frá ársbyrjun 2005 nemur rúmum þremur milljónum. Hann segir að í þessum tölum sé ekkert sem þurfi að koma á óvart enda komi það skýrt fram að þarna sé ekkert misjafnt á ferðinni.

"Raunar er það þannig að það eru margar opinberar stofnannir sem gætu tekið sér Reykjavíkurborg til fyrirmyndar því það er alltaf ferðast á sem ódýrastan hátt."

Dagur segir að á meðal þeirra verkefna sem fylgt hafa mikil ferðalög sé stórt alþjóðlegt verkefni á sviði forvarna sem hann hafi tekið að sér að stýra fyrir hönd Reykjavíkurborgar. Ferðalög tengd þeim verkefnum sem og öðrum hafi aldrei verið neitt leyndarmál.