Ívar Guðmunds bauð Kevin Costner uppá glas

Ívar Guðmundsson, útvarpsmaður á Bylgjunni, fagnar hálfrar aldar afmæli nú í dag og yfir hann rignir afmæliskveðjunum. Ýmislegt merkilegt kemur á daginn þegar litið er til baka við þessi tímamót, meðal annars það að Ívar Guðmundsson hefur gerst svo frægur að halda Kevin Costner uppi á áfengi, ef marka má orð bróður hans Hermanns Guðmundssonar, sem sendir honum bráðskemmtilega afmæliskveðju og myndir í tilefni dagsins.

„Kæri bróðir, hér eru ca. 45 ár á milli ljósmynda.  Það varla sést samt.

Á stöku myndinni sést samt að helvítis dugnaðurinn í ræktinni hefur haldið þér 20 árum yngri en almanakið segir. Þótt við höfum oft verið álíka þungir þá hafa kílóin raðast með sitt hvorum hættinum á okkur. Það eru líklega genin,“ segir Hermann og sendir bróður sínum broskall. Fjögur ár eru á milli þeirra bræðra, Hermann er fæddur árið 1962. Hermann heldur áfram:

„Innilega til hamingju með að vera orðinn hálfrar aldar gamall ! Það lenda ekki allir í því.

Margt hefur á daga okkar drifið á þessum árum og fjölmargt verið brallað.  Sem dæmi hefur líklega enginn Íslendingur hitt fleiri fræga tónlistarmenn heldur en þú og enginn annar sem ég þekki hefur þurft að halda Kevin Costner uppi á áfengi.

Við skulum skála fyrir þessum áfanga á föstudagskvöld með örfáum vinum þínum,“ skrifar Hermann á vegg litla bróður síns, útvarpsmannsins vinsæla.

Vísir hafði samband við Ívar, til að forvitnast um þetta sumbl með Costner. Ívar hlær þegar hann er spurður út í þetta.

„Ég bauð honum upp á glas á Hótel Borg hér um árið þegar hann kom til landsins. Þetta var þá Skuggabarinn. Hann var hér í júlí 1999 og allt í einu stóð hann fyrir aftan mig á Skuggabarnum og ég bauð honum drykk. Haann þakkaði fyrir sig og svo spjölluðum við svo sem ekkert meir þar sem hann var umvafinn íslenskum skvísum sem þurftu að spjalla við hann.“

Og, hvers konar drykkur var þetta sem þú bauðst honum uppá?

„Ég drakk á þessum tíma bacardi límo í sprite. Honum fannst þetta bara bragðgott og spurði hvað þetta væri?“

Ívar ætlar ekki að hafa sérstakan viðbúnað í tilefni dagsins, hefðbundinn vinnudagur sem hófst í World Class í Laugum. „Þar fékk maður gulrótarköku í Spa-inu í morgun en veislan er á föstudag.“

Vísir óskar Ívari innilega til hamingju með daginn og áfangann.