Tuttugu og þrjár konur vilja komast í lögregluna á Suðurlandi

„Við fengum sextíu og sex umsóknir í stöðu afleysingarlögreglumanna í sumar, fjörutíu og þrjár frá körlum og tuttugu og þrjár frá konum. Við munum ráða þrettán afleysingamenn í stöðurnar sem dreifast á Selfoss, Hvolsvöll, Vík, Kirkjubæjarklaustur  og á Höfn,“ segir Oddur Árnason, yfirlögregluþjónn á Suðurlandi þegar hann var  spurður hvað margir hefðu sótt um stöðurnar þrettán.

Kjartan Þorkelsson, lögreglustjóri setur í stöðurnar frá og með 1. júní til 31. ágúst. „Starfið er vaktavinna og lögreglumenn sem settir eru til starfa með starfstöðvar á Hvolsvelli, í Vík, á Kirkjubæjarklaustri eða á Höfn þurfa að standa bakvaktir.  Góð þekking á lögreglukerfinu (LÖKE) er skilyrði. Færni í mannlegum samskiptum, góðir skipulagshæfileikar, frumkvæði, nákvæmni í vinnubrögðum og hæfni til að starfa í hóp eru nauðsynlegir eiginleikar. Góð staðarþekking er kostur,“ segir m.a. í auglýsingu um störfin.