10 bestu endasprettir United

Manchester United átti ótrúlegan endasprett gegn Tottenham um helgina þegar liðið lenti 2-0 undir en vann leikinn 5-2. Þetta var ekki í fyrsta sinn sem liðið tryggir sér sigur með frábærum endaspretti.

Breska blaðið Daily Telegraph tók saman tíu eftirminnilega endaspretti sem lið Manchester United hefur átt á síðustu árum, en eins og flestir stuðningsmenn United vita var þetta ekki í fyrsta sinn sem United sallar fimm mörkum í röð á Tottenham eftir að hafa lent undir.

Man Utd 2 - Sheffield Wednesday 1 (úrvalsdeildin 1993)

John Sheridan kom Wednesday yfir með marki úr vítaspyrnu í síðari hálfleik en varnarjaxlinn Steve Bruce skoraði tvö skallamörk í uppbótartíma og tryggði liðinu sigurinn. Mörk Bruce lögðu grunninn að fyrsta titli United í 26 ár.

Man City 2 - Man Utd 3 (úrvalsdeildin 1993)

United var slegið út úr Evrópukeppninni af Galatasaray í vikunni áður og lenti 2-0 undir á gamla Maine Road. Það var hinsvegar hinn ótrúlegi Eric Cantona sem fór fyrir liðinu á frábærum endaspretti þar sem harðjaxlinn Roy Keane skoraði sigurmarkið í blálokin.

Newcastle 0 - Man Utd 1 (úrvalsdeildin 1996)

Newcastle hafði betur fyrsta klukkutímann í æsilegum titilslag á St. James´ Park en Peter Schmeichel varði eins og berserkur í marki United. Það var svo frábært mark frá Eric Cantona sem skoraði sigurmark United og lagði grunninn að hruni Newcastle þetta árið.

Juventus 2 - Man Utd 3 (undanúrslit meistaradeildar 1999)

Juventus komst snemma í leiknum í 2-0 og þegar Roy Keane fékk að líta gult spjald virtust vonir United um þrennuna renna út í sandinn. Keane skoraði hinsvegar skallamark og þeir Andy Cole og Dwight Yorke tryggðu United glæsilegan sigur og sæti í úrslitunum.

Man Utd 2 - Liverpool 1 (4. umferð enska bikarsins 1999)

United lenti undir þegar Michael Owen skoraði eftir aðeins þrjár mínútur og virtist vera á leið úr keppni. Dwight Yorke jafnaði hinsvegar þegar tvær mínútur voru eftir og allt leit út fyrir að liðin þyrftu að mætast aftur á Anfield. Norðmaðurinn Ole Gunnar Solskjær kláraði leikinn fyrir United í uppbótartíma, níu mínútum eftir að hafa komið inn sem varamaður.

Bayern Munchen 1 - Man Utd 2 (úrslitaleikur meistaradeildar 1999)

Þetta var ef til vill besti endasprettur í sögu United, en hann átti sér stað í úrslitaleik meistaradeildarinnar á Nou Camp í Barcelona.

Bayern var komið með aðra höndina á Evrópubikarinn eftir mark Mario Basler snemma leiks, en tvö mörk á þremur mínútum í blálokin frá Teddy Sheringham og Ole Gunnar Solskjær tryggðu United sigurinn og þrennuna.

Montpellier 0 - Man Utd 2 (evrópukeppni bikarhafa 1991)

Franska liðið var betri aðilinn í 1-1 jafntefli liðanna á Old Trafford í fyri leiknum, en Clayton Blackmore og Steve Bruce tryggðu liðinu óvæntan sigur í síðari leiknum í Frakklandi.

Tottenham 3 - Man Utd 5 (úrvalsdeildin 2001)

United virtist dauðadæmt eftir að hafa lent undir 3-0 á útivelli í fyrri hálfleik, en fimm leikmenn United komust á blað í ótrúlegum síðari hálfleik. Andy Cole, Laurent Blanc, Ruud van Nistelrooy, Juan Sebastian Veron og David Beckham skoruðu allir í síðari hálfleiknum,

Porto 0 - Man Utd 1 (meistaradeild 2009)

United var ekki sannfærandi í fyrri leik liðanna á Old Trafford og þurfti að gera það sem engu ensku liði hafði tekist í síðari leiknum - vinna útileik gegn Porto. Eitt fallegasta og eftirminnilegasta mark Cristiano Ronaldo tryggði liðinu farseðilinn í undanúrslitin.

Arsenal 1 - Man Utd 2 (undanúrslit enska bikarsins 1999)

United virtist í vondum málum eftir að Roy Keane var rekinn af velli og til að bæta gráu ofan á svart, gaf Phil Neville Arsenal víti með því að brjóta af sér í lokin. Peter Schmeichel varði hinsvegar vítið frá Dennis Bergkamp og sigurmark United var frægasta mark Ryan Giggs á löngum ferli þegar hann sólaði hálft Arsenal-liðið upp úr skónum og skoraði.