Drengir undir sakhæfisaldri grunaðir um íkveikju

Tveir unglingspiltar undir sakhæfisaldri eru grunaðir um íkveikju í tveimur blokkum á föstudaginn langa.

Skömmu fyrir klukkan tvö síðastliðinn föstudag var allt tiltækt slökkvilið kallað í Iðufell 4 og Gyðufell 10 eftir að kviknað hafði í anddyrum húsanna. Eldarnir kviknuðu með um tveggja mínútna millibili en greiðlega gekk að slökkva þá. Reykræsta þurfti bæði húsin.

Gunnar Hilmarsson, aðalvarðstjóri lögreglustöðvarinnar í Kópavogi, segir í samtali við fréttastofu að ekki sé vitað hvaða hvatir lágu að baki hjá drengjunum. Málið er í farvegi hjá lögreglunni og er það unnið í nánu samstarfi við foreldra drengjanna og barnaverndaryfirvöld.