Ítreka kröfu um hraðari viðræður

Þingmaður Vinstri grænna vill kosningar um aðild að ESB í ár. Ráðherra tekur undir. Verði breytingartillaga Vigdísar Hauksdóttur um kosningar um framhald viðræðna í haust samþykkt styður Framsókn kosningar um stjórnarskrá.

Guðfríður Lilja Grétarsdóttir, þingmaður Vinstri grænna, bókaði á fundi utanríkismálanefndar í gær að stefna ætti að kosningum um aðild að Evrópusambandinu (ESB) fyrir árslok. Guðfríður greiddi umsókninni ekki atkvæði sitt þegar meirihluti Alþingis samþykkti hana og ítrekar með þessu afstöðu sína um að flýta eigi viðræðunum og kjósa sem fyrst.

„Þessi vegferð dregur athygli og orku frá aðkallandi verkefnum og verður þess valdandi að tefja og takmarka þróun annarra valkosta við endurreisn íslensks samfélags. Slíkt er bæði áhættu- og kostnaðarsamt fyrir þjóðarbúskapinn,“ segir í bókuninni.

Ögmundur Jónasson, innanríkisráðherra og flokksbróðir Guðfríðar, tekur undir þetta. Hann segir það skýrt af sinni hálfu að fá eigi efnislegar niðurstöður í samningana og ljúka þeim með þjóðaratkvæðagreiðslu. „Ég heyri það innan þingsins að vaxandi stuðningur er við þessa hugsun, sem endurspeglast í málflutningi Guðfríðar Lilju, að því verði hraðað að fá niðurstöðu í málið.“

Árni Þór Sigurðsson, formaður utanríkismálanefndar, segir afstöðu Guðfríðar Lilju hafa verið ljósa lengi og ekkert nýtt komi fram í bókun hennar.

„Hún greiddi ekki atkvæði með umsóknarferlinu og þessi afstaða hennar núna breytir í sjálfu sér ekki miklu. Það getur hins vegar reynt á það núna í atkvæðum um þjóðaratkvæðagreiðslu um drög að stjórnarskrá,“ segir Árni Þór.

Þar vísar hann í breytingartillögu Vigdísar Hauksdóttur, þingmanns Framsóknarflokksins, um að þeirri spurningu verði bætt við hvort halda eigi aðildarviðræðum við ESB áfram. Svarið verði já eða nei.

Vigdís segir ljóst að farið sé að hitna mjög undir meirihluta í málinu og vísar til Guðfríðar Lilju og Ögmundar, auk Samfylkingarþingmannanna Árna Páls Árnasonar og Helga Hjörvar, sem Vigdís segir hafa opnað á slíka atkvæðagreiðslu. Spurð um afstöðu Framsóknarflokks til stjórnarskrármálsins segir hún:

„Breytingartillaga mín er tekin fyrst á dagskrá. Ef það næst meirihluti fyrir tillögu minni þá samþykkjum við þjóðaratkvæðagreiðsluna.“kolbeinn@frettabladid.is