Göt á sjókví Fiskeldis Austfjarða í Berufirði

Matvælastofnun barst tilkynning frá Fiskeldi Austfjarða þriðjudaginn 17. september um göt á nótarpoka einnar sjókvíar Fiskeldis Austfjarða við Glímeyri í Berufirði. Götin uppgötvuðust við köfun í kví og er viðgerð lokið, að því er fram kemur í tilkynningu frá Matvælastofnun.

Í tilkynningu stofnunarinnar er vísað í upplýsingar frá Fiskeldi Austfjarða um að stærsta gatið hafi verið um 2 x 15 sentímetrar og á 1 metra dýpi, fimm göt voru 2 x 6 sentímetrar og eitt gat 2 x 2 sentímetrar. Um 150.000 laxar voru í kvínni með meðalþyngd 530 grömm. Við köfunareftirlit fyrir rúmum þremur vikum, eða 22. ágúst slíðastliðinn, var nótarpoki heill.

Atvikið er til meðferðar hjá Matvælastofnun. Eftirlitsmenn stofnunarinnar munu skoða aðstæður hjá fyrirtækinu og fara yfir viðbrögð þess. Fiskeldi Austfjarða lagði út net í samráði við Fiskistofu til að kanna hvort strok hafi átt sér stað. Netanna hefur verið vitjað. Enginn lax hefur veiðst og hefur veiðiaðgerðum verið hætt.