Baldur og Heimir unnu Orkurallið

Fyrsta umferð Íslandsmótsins í ralli fór fram um helgina, rallað var á föstudegi og laugardegi á sérleiðum á Reykjanesi.

Baldur Arnar Hlöðversson og Heimir Snær Jónsson stóðu uppi sem öruggir sigurvegarar í Orkurallinu. Forskot þeirra eftir 120 kílómetra akstur á sérleiðum var ein mínúta og ellefu sekúndur.

Slagurinn um annað sætið var gríðarlega spennandi. Gunnar Karl Jóhannesson og Ísak Sigfússon luku keppni á nákvæmlega sama tíma og Sigurður Arnar Pálsson og Svavar Friðrik Smárason.

Gunnar og Ísak leiddu eftir fyrsta dag en á þriðju leið annars dags biluðu framdempararnir í Mitsubishi bíl þeirra og urðu þeir að sjá á eftir fyrsta sætinu.

Að lokum þurftu Sigurður og Svavar að sætta sig við þriðja sætið þar sem Gunnar og Ísak náðu betri tíma á fyrstu leið keppninnar.

 

Mikið um afföll

Titilvörn Ragnars Bjarna Gröndal byrjaði illa. Í ár ekur hann með Emelíu Rut Hólmarsdóttur sér við hlið en þau urðu frá að hverfa á öðrum degi með brotna spyrnu.

Gríðarlega svekkjandi þar sem þau leiddu keppnina á þeim tímapunkti. Svekkelsið breyttist þó snöggt í gleði er þau trúlofuðu sig seinna sama dag.

Mikið var um afföll í Orkurallinu, 17 bílar hófu keppni en aðeins 10 luku henni. Í fjórða sæti urðu Skafti Skúlason og Gunnar Eyþórsson á Subaru Impreza, þeir félagar töpuðu talsverðum tíma er eldur kom upp í bíl þeirra eftir tíundu sérleið.

 

Hörkuslagur í öllum flokkum

Í AB varahluta flokknum, flokki aflminni bíla, komu fyrstir í mark þeir Jósef Heimir Guðbjörnsson og Guðni Freyr Ómarsson. Þeir félagar keyrðu listavel alla helgina og var þetta fyrsti sigur Jósefs undir stýri.

Heimamennirnir Garðar Gunnarsson og Óskar Sólmundarson höfðu forustu eftir fyrsta dag. Brotinn öxull á sérleiðinni um Djúpavatn gerði hins vegar út um sigurvonir þeirra og urðu þeir að sætta sig við þriðja sætið í flokknum. Í öðru sæti í AB varahluta flokknum urðu Halldór Vilberg Ómarsson og Valgarður Thomas Davíðsson.

Tvær áhafnir urðu fyrir því óláni að velta bílum sínum á Djúpavatnsleiðinni. Guðjón Þórólfsson og Magnús Ingi Einarsson veltu Toyota Rav4 bíl sínum í fyrstu ferð af þremur um Djúpavatnið.

Í þriðju ferð um Djúpavatnið endaði Subaru Impreza bíll þeirra Vikars Sigurjónssonar og Ragnars Magnússonar einnig á toppnum. Báðar þessar áhafnir urðu frá að hverfa en allir sluppu þó án meiðsla þökk sé góðum öryggisbúnaði.

Baldur Arnar og Heimir eru nú með forustu í Íslandsmótinu eftir þessa fyrstu keppni. Næsta umferð fer fram á hröðum og skemmtilegum sérleiðum í grennd við Hólmavík í lok Júní.