59 ár síðan félag vann báða þessa titla á sama ári og Valur vann þá báða á sömu helgi

Kvennalið Vals unnu tvo Íslandsmeistaratitla um helgina og báðir unnust á Hlíðarenda. Körfuboltastelpurnar lönduðu sínum titli með sigri á Keflavík á laugardaginn og í gær unnu handbolastelpurnar þriðja sigurinn í röð á Fram.

Þetta var fyrsti Íslandsmeistaratitill Vals í kvennakörfunni en sá sautjándi í kvennahandboltanum. Handboltastelpurnar höfðu beðið í fimm ár eftir þessum titli að hafa unnið fjóra titla á fimm árum frá 2010 til 2014.

Bæði Íslandsmeistaralið Valsmanna unnu úrslitaeinvígin 3-0 og handboltaliðið fór taplaust í gegnum úrslitakeppnina í ár. Körfuboltastelpurnar töpuðu einum leik á móti KR í undanúrslitunum en það var eina tap liðsins síðan í nóvember.

Þessi helgi var mjög söguleg enda gerist ekki á hverri helgi að sama félag vinnur Íslandsmeistaratitla tvo daga í röð.

Aðeins eitt félag hafði náð að verða Íslandsmeistari í handbolta og körfubolta kvenna á sama ári en síðan voru liðin 59 ár.

Fyrsta félag til að vinna þessa Íslandsmeistaratvennu var Ármann veturinn 1959-1960. Það merkilega við þau lið að þau voru að mestu skipuð sömu leikmönnunum.

Handboltastelpurnar í Ármanni kepptu líka í körfubolta en bættu þá við tveimur handboltastelpum úr Val. Önnur þeirra var Sigríður Sigurðardóttir sem var fyrst kvenna kosin Íþróttamaður ársins fjórum árum síðar.

Valur hefur unnið annars konar tvennu hjá stelpunum á sama ári en handbolta- og fótboltalið félagsins urðu bæði Íslandsmeistarar árið 2001. Kvennalið KR hafa einnig unnið tvennu á sama ári en það var í körfubolta og fótbolta (1999 og 2002).

Það sem ekkert félag hefur náð áður er aftur á móti að vinna þrefalt í tveimur af þremur stærstu boltagreinunum á sama tímabili.

Valsliðin urðu nefnilega bæði Íslandsmeistari, bikarmeistari og deildarmeistari í vetur. Það höfðu körfubolta- og handboltalið sama félags aldrei gert áður á sama tímabili.