Matur

Aðventumolar Árna í Árdal: Hangikjöt

Sylvía Rut Sigfúsdóttir skrifar
Árni Ólafur úr Hinu blómlega búi mun koma öllum í rétta hátíðarskapið og reiða fram einn rétt á dag fram að jólum.
Árni Ólafur úr Hinu blómlega búi mun koma öllum í rétta hátíðarskapið og reiða fram einn rétt á dag fram að jólum. Vísir/Árni

Á hverjum degi fram að jólum birtum við uppskrift frá Aðventumolum Árna í Árdal sem sýndir eru á Stöð 2 í desember. Árni Ólafur úr Hinu blómlega búi mun koma öllum í rétta hátíðarskapið og reiða fram einn rétt á dag fram að jólum.  Með einskærri lífsgleði og eldmóð hefur Árni sérstakan hæfileika til að hrífa fólk með sér. Hér nær hann svo sannarlega að veita áhorfendum innblástur og töfrar fram bragðgóða og spennandi rétti alla aðventuna.

Aðventumolann má sjá hér í spilaranum að neðan en uppskrift og leiðbeiningar er að finna neðar í fréttinni. Aðventumolar Árna í Árdal eru á dagskrá Stöðvar 2 klukkan 19.10 alla daga fram að jólum nema á föstudögum eru þeir sýndir beint á eftir Allir geta dansað.  

Klippa: Hangikjöt - Aðventumolar Árna í Árdal

Innihald

1 hangilæri
1 dós grænar baunir

Rauðkál
1 rauðkálshaus (um 1,5 kíló)
100 grömm smjör
100 grömm púðursykur
200 grömm rifsberjahlaup
3 matskeiðar rauðvínsedik
100 millilítrar rauðvín
1 teskeið salt

Kartöfluuppstúf
30 grömm smjör
30 grömm hveiti
Safinn úr grænubaunadósinni
300 millilítrar köld mjólk
100 millilítrar rjómi
Sykur, eftir smekk
Salt, eftir smekk
Múskat, eftir smekk
700 gröm kartöflur, flysjaðar og soðnar

 

Leiðbeiningar

Hangilæri

Setjið hangilærið í pott af köldu vatni þannig að það fljóti yfir það. Setjið lok á pottinn og náið upp suðunni yfir miðlungshita. Látið kjötið malla í um 10 mínútur og slökkvið svo undir. Til að kjötið haldist safaríkt og meyrt ætti kjarnhitastig þess aldrei að fara yfir 70°C. Látið hangikjötið kólna í soðvatninu.


Rauðkál

  1. Fjarlægið ystu blöðin af rauðkálinu og skerið hausinn í fjórðunga. Fjarlægið stilkinn á hverjum fjórðungi og sneiðið kálið í þunnar ræmur.

  2. Bræðið smjör í stórum þykkbotna potti yfir háum hita og steikið rauðkálið í um 5 mínútur eða þar til það er aðeins farið að linast. Bætið púðursykri, rifsberjahlaupi, rauðvínsedikinu, rauðvíni og  salti.

  3. Náið upp suðunni við miðlungsháan hita og sjóðið rauðkálið í um 30 mínútur. Hrærið í pottinum af og til. Lækkið niður í miðlungslága hita og látið kálið malla í að minnsta kosti aðrar 30 mínútur eða þar til áferðin á rauðkálinu er ykkur að skapi. Rauðkálið ætti að vera dökkfjólublátt á lit og vökvinn orðinn að sírópi.


Kartöfluuppstúf

  1. Bræðið smjörið í litlum potti við vægan hita og  hrærið hveitinu saman við. Hrærið stöðugt í með písk, eldið í um 1 mínútu og bætið þá við safanum af grænu baununum. Blandan byrjar á að þykkna en þynnist svo út með mjólkinni.

  2. Hellið mjólkinni í mjórri bunu ofan í pottinn og hrærið í allan tímann. Verið viss um að fara vel í kanta pottsins til að leysa upp hveiti sem þar getur leynst. Bætið við rjóma og sykri. Hækkið í miðlungshita, náið upp suðunni hægt og rólega og hrærið stöðugt í.

  3. Lækkið undir pottinum í lægsta hita og látið malla í 5 mínútur eða þar til það er ekki lengur hveitibragð af sósunni. Bætið kartöflunum út í og hitið þær í gegn.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.