Lög­reglan segir mis­tök hafa verið gerð og biðst af­sökunar

Lögreglan á höfuðborgarsvæðinu biðst afsökunar á umfjöllun um útkall hennar á skólaskemmtun í Breiðholti í fyrrakvöld. Á fimmtudag fjallaði Vísir um að lögreglu hafi borist tilkynning um „annarlegt ástand kennara sem mætti á jólaföndur“ en fréttin var byggð á upplýsingum frá lögregluembættinu.

Í tilkynningu frá lögreglunni segir að færsla í dagbók lögreglu þar sem greint var frá aðila sem var í „annarlegu ástandi“ hafi gefið til kynna að viðkomandi hafi verið ölvaður eða undir áhrifum fíkniefna.

„Svo var þó alls ekki heldur var um veikindi að ræða. Lögreglunni hafa borist, mjög svo réttilega, kvartanir vegna fréttarinnar og harmar hún mjög að hafa valdið fólki óþægindum og sárindum.“

Lögreglan biðst því velvirðingar á mistökunum.

„Ljóst er að mistök voru gerð við upplýsingagjöf og ekki var sýnd viðeigandi nærgætni enda um viðkvæmar upplýsingar að ræða. Lögreglan á höfuðborgarsvæðinu vill því ítreka afsökunarbeiðnina og biður alla hlutaðeigendur velvirðingar,“ segir að lokum í tilkynningu lögreglunnar.