Einn milljarður geti orðið að tíu

Það að engu fjármagni sé áætlað til uppbyggingu Akureyrarflugvallar sem millilandaflugvallar í drögum að samgönguáætlun næstu fimm ára gengur þvert gegn yfirlýstri stefnu stjórnvalda. Þetta er mat framkvæmdastjóra Markaðsstofu Norðurlands. Milljarðs fjárfesting í flugstöðinni geti skilað tíu milljarða ávinningi.

Í drögum að samgönguáætlun fyrir árin 2020 til 2034, sem kynnt var á dögunum, kemur fram að það sé stefna stjórnvalda að auka verði millilandaflug um Akureyri og Egilsstaði, en fjallað var um málið í kvöldfréttum Stöðvar 2 í gær.

Sjá einnig:Beið átekta á meðan allt var í gangi og fann aðra leið til Íslands

Samhliða voru drög að samgönguáætlun fyrir árin 2020 til 2024 kynnt. Þar er aðeins gert ráð fyrir 78 milljón króna framlagi til Akureyrarflugvallar, til viðhalds og reglubundinnar endurnýjunar búnaðar. Ekki er minnst á fjármagn til uppbyggingar vallarins sem millilandaflugvallar.

Ríkisstjórnin hafi verið mjög skýr hingað til

„Gríðarleg vonbrigði, það er alveg skýrt þegar við lesum hana að það er ekki gert ráð fyrir millilandaflugi um Akureyrarflugvöll vegna þess að það er ekki sett króna í fjárfestingar á flugvellinum,“ segir Arnheiður Jóhannsdóttir, framkvæmdastjóri Markaðsstofu Norðurlands um drögin.

Sjá einnig:Jón segir uppbyggingu varaflugvalla ekki þola bið

Uppbygging Akureyrarflugvallar hefur verið í brennidepli heimamanna undanfarin ár, þannig telja þeir að renna megi styrkari stoðum undir ferðaþjónustu á Norðurandinu en einnig landinu öllu.

„Ríkisstjórnin hefur verið mjög skýr að hún vill fá þessa uppbyggingu á millilandaflugi þannig að það er mjög skrýtið að sjá samgönguáætlunina koma svona út.“ 

Rímar ekki við samræður við stjórnvöld

Lítið samræmi sé á milli hinnar fyrirhugðu samgönguáætlunar og nýlegum samtölum heimamanna við stjórnvöld um flugvöllinn

„Þetta rímar engan veginn og engan veginn við þau skilaboð og svör sem við fáum ennþá í dag þó búið sé að birta þessar tölur. Það er ekki í takt við neitt af því sem okkur hefur verið lofað og þetta er heldur ekki í takt við þann árangur sem við höfum náð.“

Millilandaflug til Akureyrar hefur skilað milljarði inn í hagkerfið á árinu.

„Það slær mann dálítið að menn geti ekki séð ávinninginn, möguleikann og tækifærin sem eru hér.“

Fimm ferðir á viku, 40 þúsund farþegar

Því er vilji fyrir því á meðal heimamanna að hamra járnið meðan það er heitt, eins milljarðs króna fjárfesting geti skilað sér margfalt til baka.

Sjá einnig:Telur að fjárfesting í Akureyrarflugvelli munu margborga sig

„Við getum sagt að hér er það flugstöðin okkar sem er sprungin. Við getum sagt að það væri milljarður í þá fjárfestingu. Hún gæti verið að skila okkur, sú breyting og síðan markaðssetning gæti verið að skila fimm ferðum á viku hér reglulega sem gæti verið að skila okkur kannski 40 þúsund farþegum á ári og tíu milljarða innspýtingu inn í hagkerfið,“ segir Arnheiður.

Gangi þetta allt saman eftir og þetta verði samþykkt tiltölulega óbreytt, hvaða áhrif hefur það á ykkur?

„Þá lit ég þannig á við hættum að reyna að koma á millilandaflugi um Akureyrarflugvöll. Það þýðir að ferðaþjónustan á Norðurlandi, Austfjörðum og Vesturlandi á ekki möguleika varðandi vetrarferðarþjónustuna.“