Tíu milljónir vegna af­mælis­há­tíðar og al­þjóð­legra verð­launa til heiðurs Vig­dísi

Ríkisstjórnin hefur samþykkt að veita af sameiginlegu ráðstöfunarfé sínu annars vegar fimm milljónir króna til afmælishátíðar til heiðurs Vigdísi Finnbogadóttur, fyrrverandi forseta, og hins vegar fimm milljónir króna til alþjóðlegra menningarverðlauna Vigdísar.

Þetta var ákveðið að ríkisstjórnarfundi í morgun. Þar segir að 15. apríl næstkomandi verði Vigdís Finnbogadóttir níutíu ára og þann 29. júní 2020 verði fjörutíu ár liðin frá sögulegu forsetakjöri hennar.

„Af sama tilefni hyggjast ríkisstjórn Íslands, Háskóli Íslands og Stofnun Vigdísar Finnbogadóttur í erlendum tungumálum koma á fót alþjóðlegum verðlaunum sem veitt verði einstaklingum sem hafa skarað fram úr með störfum sínum í þágu menningar og þá einkum tungumála. Verðlaunin verði kennd við Vigdísi Finnbogadóttur og þau veitt í fyrsta sinn á afmælishátíðinni 15. apríl 2020.

Þá var einnig samþykkt að hin alþjóðlegu menningarverðlaun verði til framtíðar hýst í mennta- og menningarmálaráðuneytinu og að tryggt verði fjárframlag á fjárlögum til Stofnunar Vigdísar Finnbogadóttur á hlut ríkisstjórnar Íslands í verðlaununum,“ segir í tilkynningunni.